گھومتی گیندوں سے لارڈز ٹیسٹ میں انگلش بیٹسمینوں کا شکار کرنے والے پاکستانی لیگ اسپنر یاسر شاہ نے میچ میں دس وکٹیں لے کر نئی تاریخ بنائی اور آئی سی سی کی بولرز ٹیسٹ رینکنگ میں بھی ٹاپ پوزیشن حاصل کر لی۔

مشتاق احمد کے بعد وہ پہلے پاکستانی بولر ہیں جنہوں نے یہ اعزاز حاصل کیا، 1996میں مشتاق احمد نے پہلی پوزیشن لی تھی۔لارڈز ٹیسٹ سے پہلے وہ چوتھے نمبر پر تھے۔

یاسر شاہ کے علاوہ ٹیسٹ رینکنگ میں محمدعامر کی بھی واپسی ہوئی ہے وہ ٹاپ سو بولرز کی فہرست میں آگئے ان کی موجودہ رینکنگ 93ویں ہے۔

چار وکٹیں لینے والے راحت علی تین درجے بہتری کے بعد 32ویں نمبر پر پہنچ گئے ہیں ، یہ ان کے کیرئیر کی بہترین رینکنگ ہے۔

بیٹنگ کی فہرست میں پاکستانی کپتان مصباح الحق کی رینکنگ میں ایک درجے بہتری آئی ہے وہ 10ویں سے 9ویں پوزیشن پر آگئے ہیں جبکہ یونس خان کی رینکنگ گر گئی ہے وہ نمبر 5سے نمبر7پر چلے گئے ہیں۔

بیٹسمنوں میں آسٹریلیا کے اسٹیون اسمتھ سر فہرست ہیں ۔