مقبوضہ کشمیر میں بھارتی فورسز نے مزید تین کشمیریوں کو شہید کردیا، نوجوانوں کے جنازے میں ہزاروں افراد نے شرکت کی، بھارتی فوج نے الزام عائد کیا ہے کہ پہلگام کے علاقے میں مسلح افراد کی موجودگی کی اطلاعات پر پولیس نے چھاپہ مارا، تو جھڑپ شروع ہو گئی۔ اتوار کی شام شروع ہونے والی یہ جھڑپ پوری رات جاری رہی، جس میں3 مسلح افراد کو شہید کر دیا گیا، جبکہ اسلحہ بھی برآمد کیا گیا۔

تفصیلات کے مطابق بھارتی فورسز نے مقبوضہ وادی کے ضلع اننت ناگ اغواء کے بعد جھوٹے مقابلے میں تین کشمیری نوجوانوں کو شہید کردیا، جس کے بعد ایک ہفتے میں قابض فوج کے ہاتھوں شہید ہونے والے نوجوانوں کی تعداد 7ہوگئی ہے۔ جنازےمیں ہزاروں افراد نے شرکت کی جبکہ وادی بھر میں بھارت مخالف احتجاج کیا گیا اور نعرے لگائے گئے۔

میڈیا کے مطابق مقبوضہ کشمیر میں بھارت کی ریاستی دہشت گردی اور غنڈہ گردی جاری ہے قابض افواج کی جانب سے کشمیریوں کی نسل کشی کیلئے ہر طرح کے ہتھکنڈے استعمال کئے جارہے ہیں۔ کل صبح بھی بھارتی فوج نے ضلع اننت ناگ کے علاقے پہلگام میں 3نوجوانوں کو اغواء کے بعد جھوٹے مقابلے میں شہید کردیا ہے۔ تینوں جوانوں کی لاشیں پہلگام کے قریب واقع ایک گاؤں کے مکان سے ملی جسے گزشتہ روز بھارتی فوج نے جلا دیا تھا۔ 3نوجوانوں کی شہادت کے بعد وادی میں ایک بار پھر بھارت کے خلاف شدید مظاہروں کا سلسلہ شروع ہوگیا ہے۔

مظاہرین کی بڑی تعداد سخت سردی کے باوجود بھارتی مظالم پر احتجاج اور پاکستان کے حق میں نعرے بازی کر رہے ہیں، جبکہ بھارتی فوج نے مظاہرین کو روکنے کے لئے ریاستی طاقت کا بھی استعمال کیا ہے جس کے نتیجے میں کئی افراد زخمی بھی ہو گئے ہیں۔

دوسری جانب سات نوجوانوں کی شہادت پر حریت رہنماؤں نےوادی میں پندرہ روزہ احتجاجی تحریک کا اعلان کردیا شیڈول کے مطابق20 اور 27جنوری کو یوم مزاحمت جبکہ بھارت کے یوم جمہوریہ پر 26جنوری کو یوم سیاہ منایا جائے گا۔