پاناما کیس میں جے آئی ٹی کی تشکیل کے حوالے سے اسٹیٹ بینک آف پاکستان نے3 نام سپریم کورٹ کو بھجوا دیے، ذرائع کے مطابق رجسٹرار آفس کو ایف آئی اے، اسٹیٹ بینک اور سیکورٹی ایکسچینج کمیشن آف پاکستان کےنام موصول ہوگئے ہیں۔

ترجمان اسٹیٹ بینک کے مطابق نام گزشتہ روز بذریعہ کورئیر بھجوائے گئے، سپریم کورٹ نے جے آئی ٹی بنانےکیلئے7 دن میں نام بھجوانے کی ہدایت کی تھی ۔

ذرائع کے مطابق نیب، آئی ایس آئی اور ایم آئی کی جانب سے بھی مشترکہ ٹیم کیلئے نام موصول ہوگئے ہیں، متعلقہ اداروں سے موصول نام منظوری کیلئے پاناما بینچ کے ججز کے سامنے پیش کیے جائیں گے، پاناما بینچ کے جج صاحبان مشترکہ تحقیقاتی ٹیم کے لیے ناموں کی منظوری دیں گے۔

ذرائع کا کہنا ہے کہ پاناما بینچ کے رکن جسٹس اعجاز افضل بیرون ملک ہیں جو کانفرنس میں شرکت کے لیے ترکی گئے ہیں، ان کی واپسی 30 اپریل کو ہو گی۔