پاکستان
18 مئی ، 2017

عالمی عدالت کے فیصلے سے حکومتی نااہلی واضح ہو گئی ، شیری رحمان

عالمی عدالت کے فیصلے سے حکومتی نااہلی واضح ہو گئی ، شیری رحمان

پیپلز پارٹی کی رہنما شیری رحمان نے کہا ہےکہ حکومت نے اپنی نااہلیت کی وجہ سے جیتا ہوا کیس ہارا ہے ، لیکن ابھی بھی کچھ بگڑا نہیں ، ابھی بھی ہم کیس میں واپس آسکتے ہیں۔

انہوں نے کہا ہے کہ قومی سلامتی کمیٹی کا اجلاس فوری بلایا جائے ، ہم پاکستان کا علم نیچے نہیں ہونے دیں گے ۔

عالمی عدالت انصاف کی جانب سے کلبھوشن یادیو کی سزا روکے جانے کے فیصلے کے بعد میڈیا سے گفتگو کرتے ہوئے شیری رحمان نے کہا کہ اب تک ہمیں منظم پیش رفت نظر نہیں آئی، ہم نے بار بار سوال اٹھایا کہ اقوام متحدہ کی جنرل اسمبلی میں یہ معاملہ کیوں نہیں اٹھایا۔

انہوں نے کہا کہ بھارت کا ایڈہاک جج بیٹھا ہوا تھا ، آپ کا ایڈ ہاک جج نہیں تھا، آپ کے پاس نوے منٹ تھے، لیکن پچاس منٹ ہی دلائل دے سکے ، اپنا ٹائم پورا استعمال کرنا چاہیے تھا ، کلبھوشن کی پاکستان میں سرگرمیاں بتانا چاہیے تھیں۔

شیری رحمان کا کہنا تھا کہ یہ حتمی فیصلہ نہیں لیکن انہوں نے اسٹے تو لے لیا ہے، ہم حساس معاملے پر سیاست نہیں کرنا چاہتے، آپ نے انٹرنیشنل فورمز پر بار بار کلبھوشن کا نام لینے سے گریز کیا ۔

انہوں نے کہا کہ ہم پاکستان کا علم نیچے نہیں ہونے دیں گے ، کیس میں ہارجیت ہوتی ہے لیکن آپ ڈٹ کر کیس تو لڑیں۔

مزید خبریں :