21 مئی ، 2017 
سعودی حکمرانوں کے آگے کیوں جھکے؟ٹرمپ بھی تنقید کی زد میں
21 مئی ، 2017
سعودی حکمرانوں کے آگے جھکنے پر سابق امریکی صدر اوباما کو تنقید کا نشانہ بنانے والے امریکی صدر ڈونلڈ ٹرمپ خود اسی عمل پر تنقید کی زد میں آگئے۔
کہتے ہیں تاریخ اپنے آپ کو دہراتی ہے، 2009 میں صدر اوباما دورہ سعودی عرب میں روایتی اقدار کے تحت سعودی حکمرانوں کے آگے جھکے تو دیگر حلقوں کے ساتھ ڈونلڈ ٹرمپ نے بھی انہیں شدید تنقید کا نشانہ بنایا۔
اس موقع پر ٹرمپ کا کہناتھاکہ سعودی حکمرانوں کے آگے جھکنا اوباما انتظامیہ کی کمزوری ہے۔
وہی ڈونلڈ ٹرمپ اب خود سعودی شاہ سلمان سے جھک کر سعودی اعزاز وصول کرنے پر امریکی عوام کی کڑی تنقید کی زد پر آگئے ہیں۔
یہی نہیں صدر ٹرمپ نے سابق خاتون اول مشعل اوباما کو بھی سر نہ ڈھانپنے پر تنقید کا نشانہ بنایا تھا اور ان کے عمل کو میزبانوں کی توہین کہا اور خود سعودی عرب پہنچے تو ان کی اہلیہ خاتون اول میلانیا اور بیٹی ایوانکا دونوں نے اپنے سر نہیں ڈھانپے۔
امریکی صدر ٹرمپ کی ماضی میں کی گئی تنقیدوں اور حال میں کیے جانے والے عمل پر میڈیا میں خوب بحث کی جارہی ہے۔
