ایران میں پاکستان کے سفیر آصف درانی کا کہنا ہے ایران کے خلاف عالمی پابندیوں کے خاتمے کے بعد امید ہے کہ پاک ایران گیس پائپ لائن منصوبہ دو سال میں مکمل کرلیا جائے گا۔

انھوں نے واضح کیا ہے کہ پاکستان کی سرزمین کسی دوسرے ملک کے خلاف استعمال کرنے کی اجازت نہیں دی جائے گی۔

ایران میں موجود پاکستانی سفیر آصف علی درانی نے ایرانی نیوز ایجنسی کو انٹرویو میں کہا کہ پاک ایران تجارت میں ایک سال کے دوران اٹھائیس فی صد اضافہ ہوا، سی پیک سے گوادر کے ساتھ ساتھ ایرانی بندرگاہ چابہار کو بھی فائدہ پہنچے گا۔

انھوں نے کہا کہ پاکستان میں دہشت گردوں کے محفوظ ٹھکانے ختم کر دیے گئے ہیں، بچے کھچے دہشت گردوں نے افغانستان میں پناہ لے لی ہے۔

ایک سوال کے جواب میں آصف درانی نے کہا کہ پاکستان کی سرحدوں پر سیکورٹی کی صورتحال کا تعلق افغانستان کے حالات سے ہے، پاکستان افغانستان میں سوویت مداخلت کے خلاف فرنٹ لائن ملک کے طور پر کھڑا ہوا جس کے نتائج اب تک سامنے آ رہے ہیں۔