سپریم کورٹ کے پاناما عملدرآمد یبنچ نے مشترکہ تحقیقاتی ٹیم کے سربراہ کو ہدایت کی ہے کہ وہ حسین نواز کی تصویر لیک کرنے والے شخص کا نام اٹارنی جنرل کو بتائیں۔

پاناما عملدرآمد بینچ کی گزشتہ روز کی کارروائی کا حکم نامہ جاری کردیا گیا جس کے مطابق عدالت نے جے آئی ٹی کے سربراہ واجد ضیا کو ہدایت کی ہے کہ وہ تصویر لیک کے ذمہ دار شخص کا نام اٹارنی جنرل کو بتائیں۔

یہ بھی پڑھیں: شریف فیملی کے اثاثے آمدن سے زیادہ ہیں، جے آئی ٹی رپورٹ

عدالتی حکم نامے میں کہا گیا ہے کہ حسین نواز کی تصویر لیک کے معاملے پر سنسنی پھیلائی گئی تاہم معاملے کی انکوائری ہوئی جس کے باوجود تصویر لیک کے ذمہ دار کا نام منظرعام پر نہیں لایا گیا۔

عدالت نے حکم نامے میں کہا کہ تصویر لیک پر کمیشن بنانا موجودہ بینچ کے دائرہ اختیار میں نہیں جب کہ حکومت کو تصویر لیک کے ذمہ دار کا نام سامنے لانے پر بھی کوئی خدشہ یا گھبراہٹ نہیں۔

یہ بھی پڑھیں: جے آئی ٹی رپورٹ مسترد، حکومت کا سپریم کورٹ جانے کا اعلان

خیال رہے کہ پاناما کیس کی مشترکہ تحقیقاتی ٹیم نے گزشتہ روز عملدرآمد بینچ کو 256 صفحات پر مشتمل حتمی رپورٹ جمع کرادی جس میں شریف فیملی کے اثاثے آمدن سے زیادہ قرار دیئے گئے ہیں۔