بالی وڈ میں بار بی ڈول کے نام سے مشہور ہونے والی اداکارہ کترینہ کیف نے زندگی کی 33 بہاریں دیکھ لیں۔

بالی وڈ کی مشہور اداکارہ کترینہ کیف 16 جولائی 1983 کو ہانگ کانگ میں پیدا ہوئیں ۔وہ بالی وڈ میں اب تک 14 سالہ سفر طے کر چکی ہیں جس کے دوران انہوں نے بالی وڈ کے تمام بڑے اداکاروں کے ساتھ اپنی اداکاری کے خوب جلوے بکھیرے اور اپنی خوبصورت اداؤں سے مداحوں کے دل میں گھر کر لیا۔

کترینہ نے بالی وڈ کا سفر 2003 کی فلم بوم سے شروع کیا جس کے مرکزی کرداروں میں امیتابھ بچن شامل تھے جو کہ باکس آفس دھوم نہ مچاسکی۔ اس کے بعد انہوں نے 2005 میں میں نے پیار کیوں کیا میں سلمان خان کے ساتھ اور 2007 میں نمستے لندن میں اکشے کمار کے ساتھ اداکاری کے جوہر دکھائے۔

کترینہ کی اداکاری کو زیادہ سراہا نہیں گیا لیکن ان کی خوبصورتی اور دلفریب اداؤں نے مداحوں کو اپنا دیوانہ کردیا۔

کترینہ نے آئٹم گانوں میں رقص کرکے بھی خوب داد وصول کی۔ ان کے مشہور گانوں میں ’کملی‘، ’شیلا کی جوانی‘ خوب مقبول ہوئے۔ وہ پاکستانی مشہور گلوکار اور اداکار علی ظفر کے ساتھ بھی کام کر چکی ہیں۔

سالگرہ کے موقع پر کترینہ کیف کو مداحوں، بالی وڈ  کے ستارے اور دیگر کی جانب سے نیک تمناؤں کا اظہار کیا جارہا ہے۔