نجم سیٹھی کی چیرمین پی سی بی تعیناتی کیخلاف دائر درخواست خارج

لاہور ہائی کورٹ نے پاکستان کرکٹ بورڈ کے چیرمین نجم سیٹھی کی تعیناتی کے خلاف دائر درخواست خارج کردی۔

نجم سیٹھی کی بطور چیرمین پی سی بی تعیناتی کے خلاف دائر درخواست پر جسٹس مامون الرشید شیخ اور جسٹس ناصر اقبال پر مشتمل دو رکنی بنچ نے سماعت کی۔

درخواست گزار نے موقف اختیار کیا کہ نجم سیٹھی کو پی سی بی آئین کے خلاف چیرمین تعینات کیا گیا۔

درخواست گزار نے کہا کہ سابق پیٹرن نواز شریف 28 جولائی کو وزارت عظمیٰ سے نااہل ہوئے اور نااہلی کے بعد نواز شریف کے مستقبل کے لئے جاری احکامات غیر مؤثر ہوگئے۔

درخواست گزار نے موقف اختیار کیا کہ نجم سیٹھی اور عارف اعجاز کے لئے 6 اگست کا بطور بورڈ آف گورنر نوٹیفکیشن غیر مؤثر ہوگیا۔

درخواست میں عدالت سے استدعا کی گئی ہے کہ 6 اگست کے نوٹی فکیشن کی بنیاد پر چیرمین پی سی بی نجم سیٹھی کی تعیناتی کالعدم کی جائے۔

نجم سیٹھی بلامقابلہ چیرمین پی سی بی منتخب

نیشنل کرکٹ اکیڈمی میں پی سی بی کے بورڈ آف گورنرز کے اجلاس میں نجم سیٹھی کا انتخاب کیا گیا۔

عدالت نے سوال کیا کہ کیا پی سی بی کے چیرمین کا عہدہ پبلک آفس کی تعریف میں آتا ہے جس پر پی سی بی کے وکیل نے کہا کہ چیرمین پی سی بی کا عہدہ پبلک آفس کی تعریف میں نہیں آتا۔

فریقین کے دلائل سننے کے بعد عدالت نے نجم سیٹھی کی بطور چیرمین پی سی بی تعیناتی کے خلاف درخواست خارج کردی۔

خیال رہے کہ 9 اگست کو  پی سی بی کے گورننگ بورڈ کے اجلاس کے دوران نجم سیٹھی بلامقابلہ پی سی بی کے چیرمین منتخب ہوئے تھے۔