اسپاٹ فکسنگ کیس: خالد لطیف نے سپریم کورٹ سے رجوع کرلیا

اسپاٹ فکسنگ میں مبینہ طور پر ملوث کرکٹر خالد لطیف نے سپریم کورٹ سے رجوع کرلیا۔

معطل کرکٹر خالد لطیف کے وکیل بدر عالم کا کہنا ہے کہ لاہور ہائی کورٹ کے فیصلے کے خلاف سپریم کورٹ میں اپیل دائر کردی جب کہ جلد سماعت کے لئے بھی درخواست کی گئی ہے۔

خالد لطیف کے وکیل کے مطابق پی سی بی کے اینٹی کرپشن ٹریبونل کی کارروائی پر اعتراض ہے جس نے غیرآئینی اور غیرقانونی سماعت کی جب کہ ٹریبونل کو تحریری جواب ارسال کردیا گیا ہے۔

وکیل کا کہنا ہے کہ اینٹی کرپشن ٹریبونل کو خالد لطیف کا تحریری جواب آج مل جائے گا اور بذریعہ ای میل بھی اطلاع کر رہے ہیں۔ 

اسپاٹ فکسنگ کیس: خالد لطیف حتمی تحریری دلائل دینے پر آمادہ

خالد لطیف کے وکیل بدر عالم نے اینٹی کرپشن ٹریبونل کو جمع کرائے جانے والا جواب تیار کرلیا، ذرائع

خیال رہے کہ 31 مارچ کو پی سی بی کے ٹریبونل نے خالد لطیف پر باقاعدہ فرد جرم عائد کرتے ہوئے انہیں بتایا کہ انہوں نے پاکستان کرکٹ بورڈ کے اینٹی کرپشن کوڈ کی 6 شقوں کی خلاف ورزی کی ہے۔

پی سی بی کی جانب سے ملنے والی چارج شیٹ کا وکیل کے ذریعے جواب دیتے ہوئے خالد لطیف نے میچ فکسڈ کرنے ، پیسے لینے اور میچ میں سودے بازی کے الزام کو مسترد کیا البتہ بکیز سے رابطہ کرنے پر ٹیم مینجمنٹ کو آگاہ نہ کرنے کی غلطی کا اعتراف کیا تھا۔