ورلڈ الیون سے سیریز 3 سال تک ہوگی، چیرمین پی سی بی

لاہور: پاکستان کرکٹ بورڈ کے چیرمین نجم سیٹھی کا کہنا ہےکہ ورلڈ الیون اور پاکستان کے درمیان سیریز کا سلسلہ 3 سال تک جاری رہے گا۔

پاکستان میں عالمی کرکٹ کے دروازے کھل چکے ہیں اور گزشتہ روز لاہور کے قذافی اسٹیڈیم میں ورلڈ الیون اور قومی ٹیم کے درمیان پہلا ٹی ٹوئنٹی میچ ہوا جس میں شائقین کرکٹ نے انتہائی پرجوش انداز میں شرکت کی جب کہ ورلڈ الیون کا بھی شاندار استقبال کیا گیا۔

پاکستان میں کرکٹ کی بحالی پر دنیائے کرکٹ کے بڑے ناموں نے بھی خوشی اور پاکستان کے لیے نیک تمناؤں کا اظہار کیا ہے۔

کراچی سے خیبر تک اب صرف کرکٹ کی بات ہوگی، رمیز راجا

بحیثیت قوم ہمیں یہ سوچنا چاہیے کہ پاکستان میں عالمی کرکٹ آرہی ہے، سابق کپتان

پاکستان کرکٹ بورڈ کے چیرمین نجم سیٹھی نے غیر ملکی اخبار سے گفتگو میں پاکستان کے کرکٹ شائقین کو ایک اور خوشخبری سنائی۔

نجم سیٹھی کا کہنا تھا کہ ورلڈ الیون کے دورہ پاکستان کا سلسلہ جاری رہے گا، ورلڈ الیون ہر سال پاکستان کا دورہ کرے گی اور یہ سیریز مسلسل 3 سال تک کھیلی جائے گی۔

چیرمین پی سی بی نے کہا کہ سری لنکا کی ٹیم اکتوبر اور ویسٹ انڈیزکی ٹیم نومبر میں آئے گی جب کہ اگلے سال ایک سے 2 بڑی ٹیمیں پاکستان کا دورہ کریں گی اور اگر سب کچھ ٹھیک رہا تو آئندہ سالوں میں مزید بڑی ٹیمیں پاکستان آسکتی ہیں۔

پاکستان میں انٹرنیشنل کرکٹ کی بحالی کیلئے طویل سفر طے کرنا پڑا: جائلز کلارک

پاکستانی حکومت اور خاص طور پر سیکیورٹی اداروں کا شکر گزار ہوں، آئی سی سی ڈائریکٹر

انہوں نے مزید کہا کہ 2 سال پہلے بورڈ اس طرح کا رسک نہیں لینا چاہتا تھا لیکن اب دہشت گردی کے خلاف 90 سے 95 فیصد مقاصد حاصل کرچکے ہیں اس لیے ملک کی بہتر صورتحال عالمی برادری کو ہماری طرف متوجہ کرے گی۔

واضح رہےکہ ورلڈ الیون ٹیم میں غیر ملکی ٹیموں کے بڑے نام شامل ہیں اور ان کی سیکیورٹی کے لیے انتہائی سخت اقدامات اٹھائے گئے ہیں۔