ممبئی میں شدید بارشیں، ٹرین سروس متاثر اور پروازیں منسوخ
20 ستمبر ، 2017
بھارتی شہر ممبئی میں بارشوں کاسلسلہ دوبارہ شروع ہوگیا جس کے باعث شہر کا نظام درہم برہم ہوگیا۔
بھارتی میڈیا کے مطابق شہر میں گزشتہ شام سے شدید بارشوں کا سلسلہ جاری ہے جب کہ طوفانی موسم کے باعث سمندر سے بلند لہریں اٹھنے کا بھی امکان ہے۔
میڈیا رپورٹس کے مطابق شدید بارشوں کے باعث شہر میں ٹرین سروس معطل کردی گئی ہے اور ایئرپورٹس کے رن وے پر پانی جمع ہونے سے 50 سے زائد پروازیں منسوخ ہوگئی ہیں۔
شہر میں بارشوں کی وجہ سے تعلیمی ادارے بھی بند ہیں جب کہ شہر کے بیشتر علاقوں میں پانی جمع ہونے سے کئی علاقے زیر آب آگئے اور نظام زندگی مفلوج ہوگیا۔
بارش سے رات گئے ممبئی ایئر پورٹ پر کم حد نگاہ، تیز ہواؤں اور پھسلن کے باعث ایک طیارہ رن وے سے اتر گیا تاہم حادثے میں تمام مسافر محفوظ رہے۔
بھارتی محکمہ موسمیات نے جمعے تک بارشیں جاری رہنے کا امکان ظاہر کیا ہے۔
