نجم سیٹھی کراچی میں پی ایس ایل کیلئے کل وزیراعلیٰ سے ملیں گے

پاکستان کرکٹ بورڈ کے چیرمین نجم سیٹھی کراچی میں پی ایس ایل میچز کے انعقاد کے لئے کل وزیراعلیٰ سندھ سے ملاقات کریں گے۔

ذرائع کے مطابق چیرمین پی سی بی نجم سیٹھی اور وزیراعلیٰ سندھ سید مراد علی شاہ کے درمیان کل صبح گیارہ بجے ملاقات شیڈول ہے جس میں پی ایس ایل تھری کے کچھ میچز کراچی میں کرانے کے حوالے سے بات چیت کی جائے گی۔

ذرائع کا کہنا ہے کہ سندھ حکومت نے نیشنل کرکٹ اسٹیڈیم میں پی ایس ایل میچز کرانے کے لئے چیرمین پی سی بی نجم سیٹھی کو سیکیورٹی سمیت ہر قسم کے تعاون کی یقین دہانی کرائی ہے۔

اس سے قبل وزیراعلیٰ سندھ سید مراد علی شاہ نے ورلڈ الیون ٹیم کی آمد کے موقع پر ایک میچ کراچی میں کرانے کی خواہش کا اظہار کیا تھا جس پر نجم سیٹھی کا کہنا تھا کہ جلد عالمی کرکٹر ملک کے دیگر شہروں میں بھی کھیلیں گے۔