فاروق ستار کا ڈپٹی میئر کراچی کو عہدے سے ہٹانے کیلئے الیکشن کمیشن کو خط

متحدہ قومی موومنٹ پاکستان کے سربراہ فاروق ستار نے پاک سرزمین پارٹی میں شامل ہونے والے ڈپٹی میئر کراچی ارشد وہرہ کو عہدے سے ہٹانے کے لئے چیف الیکشن کمشنر کو خط لکھ دیا۔ 

جیو نیوز کے مطابق فاروق ستار کی جانب سے الیکشن کمیشن کو لکھے گئے خط میں کہا گیا ہے کہ ارشد وہرہ کا ایم کیو ایم چھوڑ کر دوسری جماعت میں شامل ہونا آئین و قانون کی خلاف ورزی ہے اس لئے انہیں نااہل قرار دیا جائے۔

خط میں مطالبہ کیا گیا ہے کہ ارشد وہرہ کی ڈپٹی میئر کے عہدے سے نااہلی کا نوٹیفکیشن فوری جاری کیا جائے۔

فاروق ستار نے الیکشن کمیشن کو لکھے گئے خط میں رابطہ کمیٹی کے 3 نومبر کے اجلاس کا بھی حوالہ دیا جس کے مطابق اجلاس میں ارشد وہرہ کے معاملے پر انہیں قانونی کارروائی کا اختیار دیا گیا تھا۔

ڈپٹی میئر کراچی ارشد وہرا پاک سرزمین پارٹی میں شامل

بدقسمتی ہے کراچی کے عوام کو جو دے سکتے تھے نہ دے سکے، ارشد وہرا

سربراہ ایم کیو ایم پاکستان نے ارشد وہرہ کو نااہل قرار دینے کے بعد خالی نشست پر ضمنی الیکشن کرانے کا بھی مطالبہ کیا ہے۔

خیال رہے کہ 29 اکتوبر کو ڈپٹی میئر کراچی ارشد وہرہ نے ایم کیو ایم پاکستان کو خیرباد کہ کر پاک سرزمین پارٹی میں شامل ہونے کا اعلان کیا تھا۔

پی ایس پی میں شمولیت کے اعلان کے بعد ارشد وہرہ نے ڈپٹی میئر کراچی کے عہدے سے استعفیٰ دینے سے انکار کرتے ہوئے عہدے پر برقرار رہنے کا اعلان کیا تھا۔

ایم کیو ایم پاکستان، پی ایس پی کا ایک نام، ایک نشان سے انتخابات لڑنے کا اعلان

اب جو بھی شناخت ہوگی ایم کیو ایم نہیں ہوگی، پہلے دن سے موقف تھا ایم کیو ایم بانی متحدہ کی تھی اور رہے گی، مصطفیٰ کمال

ایم کیو ایم پاکستان اور پی ایس پی نے 8 نومبر کو سیاسی اتحاد کا اعلان کیا اور اتحاد اور انضمام کے معاملے پر دونوں جانب سے ابہام پایا جاتا ہے۔ 

پی ایس پی کے سربراہ مصطفیٰ کمال نے پریس کانفرنس کے دوران فاروق ستار کی موجودگی میں ایک نام، ایک نشان اور ایک منشور سے انتخابات میں جانے کا اعلان کیا تو وہیں ایم کیو ایم پاکستان کے سربراہ نے اسے سیاسی اتحاد کا نام دیا۔

فاروق ستار نے سیاست سے دستبرداری کا فیصلہ واپس لے لیا

والدہ کا حکم ہے سیاست اور ایم کیو ایم پاکستان میں رہنا ہے، میں اپنی والدہ کے حکم کے آگے سرجھکاتا ہوں، سربراہ ایم کیو ایم پاکستان

پی ایس پی کے ہمراہ پریس کانفرنس کے بعد فاروق ستار کو پارٹی کے اندرونی حلقوں کی جانب سے شدید مخالفت کا سامنا ہے۔

پارٹی رکن علی رضا عابدی نے ایم کیو ایم پاکستان اور اسمبلی رکنیت چھوڑنے کا اعلان کیا جب کہ عامر خان بھی مفاہمت سے ناخوش ہیں اور دیگر رہنماؤں نے بھی اسی قسم کے ردعمل کا اظہار کیا۔

پی ایس پی اتحاد سے ناراض ایم کیو ایم اراکین اسمبلی کا پیپلز پارٹی میں شمولیت کا امکان

ذرائع کے مطابق ایم کیو ایم کے سات اراکین نے پیپلز پارٹی میں شمولیت کا فیصلہ کرلیا ہے، پیپلز پارٹی کی جانب سے دو روز میں اہم پریس کانفرنس متوقع ہے

ذرائع کے مطابق ایم کیو ایم کے 7 اراکین نے پیپلز پارٹی میں شمولیت کا فیصلہ کرلیا ہے اور پیپلز پارٹی کی جانب سے آئندہ ایک دو روز میں اہم پریس کانفرنس بھی متوقع ہے۔

پیپلزپارٹی کی قیادت سے اسلام آباد میں ملاقات کرنے والوں میں سلمان مجاہد بلوچ، ڈاکٹر فوزیہ علی، خوش بخت شجاعت اور دیگر شامل ہیں۔

دوسری جانب ایم کیو ایم پاکستان کے سربراہ فاروق ستار نے گزشتہ روز سیاست سے دستبردار ہونے کا اعلان کرنے کے کچھ دیر بعد اسے واپس بھی لے لیا۔