20 نومبر ، 2017
بالی وڈ کے میگا اسٹار امیتابھ بچن کی پوتی اور ایشوریا رائے اور ابھیشیک بچن کی صاحبزادی آرادھیا بچن رواں ماہ 16 نومبر کو 6 برس کی ہوگئیں۔
اس موقع پر بچن خاندان نے ڈنر کا اہتمام کیا تھا، جس کی تصاویر گذشتہ ہفتے وائرل ہوئیں، لیکن آرادھیا کی سالگرہ کی باقاعدہ تقریب ہفتہ (18 نومبر) کی رات کو منعقد کی گئی۔
سالگرہ کی اس شاندار پارٹی میں بولی وڈ کنگ شاہ رخ خان نے اپنے بیٹے ابرام اور مسٹر پرفیکشنسٹ عامر خان نے اپنے بیٹے آزاد راؤ خان کے ہمراہ شرکت کی۔
بگ بی نے اس موقع کی چند تصاویر مداحوں سے شیئر کیں، جن میں سے ایک تصویر میں ابرام ہاتھ میں کاٹن کینڈی پکڑے انتہائی خوش نظر آئے۔
امیتابھ نے لکھا، 'بڈھی کے بال' والی کون لینے کے بعد ابرام کے تاثرات 'انمول' تھے۔
امیتابھ نے اپنی پوتی کی بھی چند تصاویر شیئر کیں، جن میں وہ اپنے والدین کے ہمراہ خوبصورت لباس پہنے مہمانوں کو کیک کھلاتی نظر آئیں۔
اگر کام کے حوالے سے بات کی جائے تو امیتابھ اس وقت یش راج فلمز کے بینر تلے بننے والی فلم 'ٹھگس آف ہندوستان' کی شوٹنگ میں مصروف ہیں، جس کی کاسٹ میں عامر خان، کترینہ کیف اور فاطمہ ثناء شیخ شامل ہیں۔
دوسری جانب ان کی بہو ایشوریا رائے فلم 'فنے خان' کی شوٹنگ میں مصروف ہیں، جس میں ان کے ساتھ انیل کپور اور راج کمار راؤ بھی کام کر رہے ہیں۔