تین ماہ میں چوتھی کوشش ناکام، زرداری کا نوازشریف سے ملنے سے انکار

اسلام آباد: پیپلزپارٹی کے شریک چیرمین آصف زرداری نے نوازشریف سے ملاقات سے انکار کردیا۔

میاں نوازشریف نے گزشتہ روز نمائندہ جیونیوز سے خصوصی گفتگو کرتے ہوئے کہا تھا کہ وہ ملک اور جمہوریت کے لیے آصف زرداری سے بغیر کسی شرط کے ہاتھ ملانے کو تیار ہیں۔

ملک کیلئے آصف زرداری سے غیر مشروط طور پر ہاتھ ملانے کو تیار ہوں، نوازشریف

کل پارلیمنٹ نے اہم فیصلہ کیا اور آمر کے کالے قانون کو مسترد کردیا، آمروں کے قانون کی حمایت پر پیپلز پارٹی پر افسوس ہوا، سابق وزیراعظم

ذرائع کے مطابق آصف زرداری اور نوازشریف کےد رمیان ملاقات کی کوششیں گزشتہ تین سے چار ماہ سے جاری تھیں لیکن یہ چوتھی کوشش بھی ناکام ہوگئی ہے اور آصف زرداری نے نوازشریف سے ملنا یا ہاتھ ملانا خارج از امکان قرار دیدیا ہے۔

ذرائع نے بتایا کہ آصف زرداری سمجھتے ہیں کہ موجودہ ملکی سیاسی صورتحال کے ذمہ دار نوازشریف ہیں، انہیں صرف اپنی ذات کے لیے میثاق جمہوریت یاد آتا ہے۔

ذرائع کے مطابق سابق صدر کا مؤقف ہے کہ انہیں ہمیشہ ڈسا گیا ہے، پیپلزپارٹی نے میثاق جمہوریت کیا جس کا اسے نقصان ہوا اور نوازشریف آخری وقت میں انہیں چھوڑ کر چلے گئے۔

زرداری، نواز کے درمیان رابطہ کرانے میں ناکام رہا، خواجہ آصف

ہوسکتا ہے آصف زرداری کی کچھ شکایات جائز ہوں، ان پر بات ہوسکتی ہے، وزیر خارجہ

واضح رہےکہ گزشتہ روز قائد حزب اختلاف خورشید شاہ نے کہا تھا کہ وزیراعظم شاہد خاقان عباسی نے ان سے پارٹی کی اعلیٰ قیادت سے ملاقات کرانے کی درخواست کی تھی تاکہ حلقہ بندیوں سے متعلق بل پر قانون سازی کی جاسکے۔

اس سے قبل وزیر خارجہ خواجہ آصف بھی اس بات کا اعتراف کرچکے ہیں کہ نوازشریف نے انہیں آصف زرداری کو منانے کا ٹاسک دیا تھا جس میں وہ ناکام ہوگئے۔