Can't connect right now! retry
Advertisement

دنیا
11 جنوری ، 2018

وزیراعلیٰ بنگال کے ساتھ لندن جانے والے بھارتی صحافیوں نے ہوٹل کے چمچے چرالیے

وزیراعلیٰ بنگال ممتا بینرجی کے ساتھ دورہ لندن پر گئے ہوئے تمام صحافی 'سینئر ایڈیٹرز' تھے—۔فائل فوٹو

بھارتی ریاست مغربی بنگال کی وزیراعلیٰ ممتا بینرجی کے ساتھ لندن کے دورے پر گئے صحافیوں نے بھارت کی عزت خاک میں ملادی اور کھانے کے دوران ہوٹل کے چاندی کے چمچے چرانے کی ویڈیو سی سی ٹی وی کیمروں میں محفوظ ہوگئی۔

آؤٹ لک کی ایک رپورٹ کے مطابق بنگال کی وزیراعلیٰ ممتا بینرجی اِن دنوں لندن کے دورے پر ہیں، اس موقع پر ان کے ساتھ گئے ہوئے ایک بنگالی اخبار کے رپورٹر نے کانفرنس ہال میں کھانے کے دوران میز پر سے ایک چمچ اٹھایا اور اپنی جیب میں منتقل کردیا۔

اس حرکت سے دیگر صحافی بھی 'متاثر' ہوئے اور انہوں نے بھی چاندی کے چمچ اٹھا کر اپنی اپنی گود میں موجود بیگوں اور پرس میں رکھ لیے۔

لیکن ان صحافیوں کو شاید یہ معلوم نہیں تھا کہ ان کی چوری ہوٹل میں لگے خفیہ سی سی ٹی وی کیمروں میں ریکارڈ ہورہی ہے۔

جب ہوٹل کے سیکیورٹی عملے نے اس واقعے کی نشاندہی کی تو زیادہ تر صحافیوں نے چاندی کے برتن واپس کردیئے لیکن ایک صحافی نے یہ ماننے سے ہی انکار کردیا کہ انہوں نے ایسی کوئی حرکت کی ہے، حالانکہ کیمرے میں ان کا یہ 'کارنامہ' بخوبی ریکارڈ ہوچکا تھا۔

ہوٹل انتظامیہ نے بھارتی صحافیوں سے چمچے برآمد کرکے 50 پاؤنڈ جرمانہ بھی عائد کیا۔

رپورٹ کے مطابق ممتا بینرجی کے ساتھ دورہ لندن پر گئے ہوئے تمام صحافی 'سینئر ایڈیٹرز' تھے، جنہیں ان کے اداروں نے وزیراعلیٰ بنگال کے اس اہم دورے کے سلسلے میں لندن بھیجا تھا۔


Advertisement