شمالی افریقہ کے ملک تیونس کے مفتی اعظم نے عوام سے بے ہنگم مظاہروں اور دھرنوں کی سیاست ترک کرنے کی ہدایت کردی ہے کیونکہ اس سے ملک کو نقصان کے علاوہ کچھ حاصل نہیں ہوگا۔
عرب میڈیا کے مطابق مفتی اعظم تیونس عثمان بطیخ کے دفتر سے جاری پیغام میں عوام سے اپیل کی گئی ہے کہ وہ تمام توانائیاں اپنے کاروبار، روز مرہ کے کاموں اور تعلیمی سرگرمیوں کو بہتر بنانے پر صرف کریں تاکہ ملک کی گرتی ہوئی معیشت کو سہارا دیا جا سکے۔
مفتی اعظم کا یہ بیان ایسے وقت میں آیا ہے جب تیونس کی اپوزیشن جماعت نے بدعنوانی اور بے روزگاری کے خلاف مظاہروں اور دھرنوں کا اعلان کیا ہے۔ اس سال کے آغاز سے ابتک ملک بھر میں دوہزار سے زائد مظاہرے اور دھرنے دیے جاچکے ہیں۔