برازیل میں حکومت کی جانب سے اخراجات میں کمی کے فیصلے کے بعد عوام سڑکوں پر آگئے ۔مشتعل مظاہرین نے سرکاری عمارات پر پتھرائو کیا۔ متعدد دکانوں کے شیشے توڑ دئیے اورکئی گاڑیاں بھی جلا دیں ۔
غیر ملکی خبر ایجنسی کے مطابق برازیل کے صدر کی جانب سے اخراجات میں کمی کے لیے ملک بھر میں بچت اقدامات کا اعلان کیا گیا تھاجس کے تحت ریٹائرمنٹ کی عمر بڑھانے اور پنشن میں کمی سمیت دیگر لیبر قوانین میں تبدیلی کا اعلان کیا گیا تھا ۔
حکومت کے فیصلے کے بعد ملک کے بیشتر شہروں میں مظاہرین نے احتجاج کیا اور متعدد سرکاری عمارات پر پتھراؤ کرکے شیشے توڑ دئیے ۔
احتجاج کے دوران لیبر یونین نے فیکٹریاں ، بینک اور دیگر کاروبار بند رکھے جبکہ اسکول اور ٹرانسپورٹ بھی بند رکھی گئی تھی ۔
مظاہرین کا موقف تھا کہ حکومتی اقدامات کی وجہ سے انہیں ریٹائرمنٹ اور پنشن کے لیے مزید عرصے تک کام کرنا ہوگا ۔