امیر جماعت اسلامی سراج الحق کا کہنا ہے کہ آرٹیکل 62 اور 63 کا اطلاق سیاستدانوں کے علاوہ ججز، جرنیلوں اور بیوروکریٹس پر بھی ہونا چاہیے۔
امیر جماعت اسلامی نے سابق وزیراعظم نواز شریف کی ریلی کے دوران گاڑی کے نیچے آکر جاں بحق ہونے والے بچے حماد کی رسم قل میں شرکت کی۔
میڈیا سے بات کرتے ہوئے سراج الحق کا کہنا تھا کہ آرٹیکل 62 اور 63 صرف سیاستدانوں کے لئے نہیں ہے، اس کا اطلاق تمام ججز، جرنیلوں اور بیوروکریٹس پر بھی ہونا چاہیے۔
امیر جماعت اسلامی نے کہا کہ ہمارے معاشرے میں وی وی آئی پی کلچر فروغ پارہا ہے اور یہاں غریبوں کا کوئی پرسان حال نہیں ہے۔
سراج الحق نے کہا کہ نواز شریف کی ریلی میں بچے کو کوئی اہمیت نہیں دی گئی جسے سڑک پر تڑپتا ہوا چھوڑ کر چلے گئے، گاڑی کی نمبر پلیٹ اور گاڑی کا پتہ ہے، امید ہے کہ اصل مجرم کو گرفتار کرلیا جائے گا۔