سپریم کورٹ نے آئی جی پنجاب کو سمبڑیال میں قتل ہونے والے صحافی ذیشان بٹ کے قتل کے مرکزی ملزم کو 10 روز میں گرفتار کرنے کا حکم دیا ہے۔
سمبڑیال میں صحافی کے قتل سے متعلق ازخود نوٹس کی سماعت سپریم کورٹ میں چیف جسٹس ثاقب نثار کی سربراہی میں ہوئی۔
سماعت کے دوران آئی جی پنجاب عارف نواز نے صحافی ذیشان بٹ کے قتل کے ملزموں کی گرفتاری سے متعلق رپورٹ سپریم کورٹ میں جمع کرائی۔
آئی جی پنجاب سے بتایا کہ ملزم ثقلین علی، شاہد اور شاہد محمود کو گرفتار کر لیا ہے تاہم قتل کا مرکزی ملزم عمران عرف مانی مفرور ہے۔
چیف جسٹس نے آئی جی پنجاب سے استفسار کیا کہ مرکزی ملزم کو کب تک گرفتار کریں گے۔
انسپکٹر جنرل پولیس عارف نواز نے کہا کہ ملزم عمران کی گرفتاری کے لیے 10 روز کی مہلت دی جائے۔
سپریم کورٹ نے ذیشان بٹ کے قتل کے ملزم عمران کو 10 روز میں گرفتار کر کے عمل درآمد رپورٹ طلب کر لی۔
یاد رہے ذیشان بٹ کو 27 مارچ کی دوپہر کو اس وقت قتل کیا گیا جب وہ دکانداروں پر عائد کیے جانے والے ٹیکس کے حوالے سے معلومات لینے یونین کونسل بیگوالا کے دفتر پہنچے تھے۔
اطلاعات کے مطابق صحافی ذیشان بٹ اور یوسی چیئرمین عمران چیمہ کے درمیان ماضی میں بھی سیاسی طور پر رنجشیں رہی ہیں۔
ان دونوں نے بلدیاتی انتخابات میں بھی ایک دوسرے کے خلاف الیکشن لڑا تھا۔
ذیشان بٹ پر تین گولیاں فائر کی گئی تھیں جس کے بعد مرکزی ملزم عمران چیمہ موقع سے فرار ہوگیا تھا، ساتھ ہی ملزم کے اہلخانہ بھی علاقہ چھوڑ کر جاچکے ہیں۔
پولیس کا کہنا ہے کہ جدید تکنیکی طریقوں کو بروئے کار لاتے ہوئے ملزم کی تلاش جاری ہے۔