ایم کیو ایم پاکستان کے منحرف رکن سندھ اسمبلی سیف الدین خالد نے پانی کی عدم فراہمی کے خلاف سندھ اسمبلی کے اندر احتجاج کیا جس کے دوران ان کی طبیعت بھی خراب ہو گئی۔
ایم کیو ایم پاکستان کے رکن اسمبلی نے سندھ اسمبلی کے اجلاس کے دوران پانی کی عدم فراہمی کے خلاف احتجاج کر رکھا ہے جس میں ایم کیو ایم کے منحرف اراکین نے بھی ان کا ساتھ دیا۔
سیف الدین خالد نے کہا کہ میں اپنے کپڑے اور چنے بھی ساتھ لایا ہوں اور اسمبلی کا اجلاس ختم ہونے کے بعد بھی احتجاج کروں گا۔
سندھ اسمبلی کا اجلاس ختم ہونے کے بعد ایوان میں لائٹ، اے سی اور دروانے بند ہونے کے باعث سیف الدین کی طعبیت خراب ہو گئی جس پر انہوں نے پینے کے لیے پانی منگوا لیا۔
سیف الدین خالد نے کہا کہ غریب آدمی ہوں لیکن اس کے باوجود اپنی جیب میں 100 ٹینکر کے پیسے دے رہا ہوں، جب تک ٹینکر میرے حلقے میں نہیں پہنچ جاتے اس وقت تک میں یہیں رہوں گا۔
سیف الدین خالد نے پانی کے ٹینکرز کے لیے حکومتی بینچوں سے 25 ہزار روپے بھی جمع کر لیے۔
ایم پی اے ناہید بیگم نے کہا کہ سیف الدین خالد شوگر کے مریض ہیں، اگر انہیں کچھ ہوا تو ذمہ دارحکومت ہو گی۔