LIVE

پی پی رہنما شرجیل میمن پر شراب برآمدگی کیس میں فردِ جرم عائد

ویب ڈیسک
February 26, 2020
 

ملزمان کی جانب سے صحت جرم سے انکار پر عدالت نے 18 مارچ کو کیس کے گواہوں کو طلب کرتے ہوئے سماعت ملتوی کردی— فوٹو: فائل 

سابق وزیرِ اطلاعات سندھ اور پاکستان پیپلز پارٹی کے رہنما شرجیل میمن پر شراب برآمدگی کیس میں فردِ جرم عائد کر دی گئی۔

جوڈیشل مجسٹریٹ جنوبی کراچی نے شرجیل میمن ودیگر کے خلاف شراب برآمدگی کیس کی سماعت کی۔

سماعت کے موقع پر شرجیل میمن و دیگر ملزمان عدالت میں پیش ہوئے جہاں عدالت نے شرجیل میمن سمیت چاروں ملزمان پر فرد جرم عائد کردی۔

ملزمان کی جانب سے صحت جرم سے انکار پر عدالت نے 18 مارچ کو کیس کے گواہوں کو طلب کرتے ہوئے سماعت ملتوی کردی۔

خیال رہے کہ یکم ستمبر 2018 کو سابق چیف جسٹس پاکستان ثاقب نثار نے ضیاء الدین اسپتال میں واقع سب جیل کا دورہ کیا تھا، جہاں شرجیل میمن زیرِ علاج تھے۔ 

چیف جسٹس کے دورے کے دوران شرجیل میمن کے اسپتال کے کمرے سے مبینہ طور پر شراب کی 3 بوتلیں برآمد ہوئی تھیں۔