اسلام آباد پولیس کے اہلکاروں کی فائرنگ سے نوجوان طالب علم کی ہلاکت کے واقعے کی فوری جوڈیشل انکوائری کا فیصلہ کیا گیا ہے۔
چیف کمشنر اسلام آباد عامر علی احمد نے اسلام آباد پولیس کے اہلکاروں کی فائرنگ سے نوجوان کی ہلاکت کےمعاملےکا نوٹس لیتے ہوئے فوری جوڈیشل انکوائری کا حکم دیا ہے۔
جیو نیوز سےگفتگو کرتے ہوئے چیف کمشنر اسلام آباد عامر احمد علی نے بتایاکہ واقعےکی فوری جوڈیشل انکوائری کے لیے ایڈیشنل ڈسٹرکٹ مجسٹریٹ مقررکردیا ہے۔
عامر احمد علی کےمطابق ایڈیشنل ڈسٹرکٹ مجسٹریٹ دیگر سینئر قانونی افسران کی ٹیم کی مدد سے نوجوان اسامہ ستی کی پولیس فائرنگ سے ہلاکت کی انکوائری کریں گے اور اپنی رپورٹ پیش کریں گے جس کو وفاقی حکومت کو پیش کیاجائےگا۔
خیال رہے کہ گذشتہ روز اسلام آباد میں رات گئے اینٹی ٹیررازم اسکواڈ (اے ٹی ایس) کے اہلکاروں کی فائرنگ سے کار سوار نوجوان اسامہ ندیم جاں بحق ہوگیا تھا۔
ابتدائی طور پر پولیس نے واقعے کو ڈکیتی کا رنگ دیا تھا،بعد ازاں پانچ پولیس اہلکاروں کو حراست میں لے کر ان کے خلاف انسداد دہشت گردی اور قتل کی دفعات کے تحت ایف آئی آر درج کر لی گئی ہے۔