مستونگ میں کوئٹہ تفتان شاہراہ پر مسافر کوچ اور کار کے درمیان تصادم کے نتیجے میں ایک ہی خاندان کے7 افرادجاں بحق ہوگئے۔
لیویز حکام کے مطابق حادثہ کوئٹہ تفتان قومی شاہراہ پر مستونگ کے علاقے پڈین کے مقام پر پیش آیا جہاں مسافر کوچ اور کار میں تصادم ہوا جس کے نتیجے میں 2 افراد موقع پر جاں بحق جب کہ 7 افراد شدید زخمی ہو ئے جنہیں طبی امدادکے لیے شہید نواب غوث بخش رئیسانی اسپتال منتقل کیا گیا۔
اسپتال حکام کے مطابق زخمیوں میں سے 2خواتین اور بچوں سمیت 5 مزید افراد زخموں کی تاب نہ لاتے ہوئے جاں بحق ہوگئے جب کہ 2 زخمیوں کی حالت بھی تشویش ناک بتائی جاتی ہے۔
حکام کے مطابق جاں بحق اور زخمی ہونے والے افراد کا تعلق نوشکی کے ایک ہی خاندان سے ہے۔