ویکسینیشن نہ کرانے والوں کی موبائل سِم بند کرنے کے حکومتی اقدامات کے خلاف عدالت جانا وکیل کو مہنگا پڑگیا۔
مقامی ایڈوکیٹ سہیل حمید نے کورونا ویکسین نہ لگوانے والوں کی موبائل سم اور سوشل آئی ڈیز بندکرنے کے حکومتی اعلان کے خلاف سندھ ہائیکورٹ سے رجوع کیا۔
درخواست میں مؤقف تھاکہ ویکسین لگوانا عوام کی اپنی صوابدید ہے، حکومت اپنے فیصلے عوام پر جبری طور پر لاگو نہیں کرسکتی، قانون سازی کے بغیر کسی کوویکسین لگوانے پر مجبور نہیں کیا جاسکتا لہٰذا حکومت کو شہریوں کی موبائل سمیں بند کرنے سے روکا جائے۔
عدالت نے درخواست پر برہمی کا اظہار کرتے ہوئے کہا کہ اول تو حکومت نے اس حوالے سے باقاعدہ نوٹیفکیشن جاری نہیں کیا، دوسرے یہ کہ حکومت کوعوام کی فکر ہے، کورونا وائرس کا شکار شخص چلتا پھرتا بم ہےجو دوسروں کو بھی متاثر کرسکتا ہے۔
عدالت نے درخواست ناقابل سماعت قرار دیتے ہوئے مسترد ہی نہیں کی بلکہ درخواست گزار پر 25 ہزار روپے کا جرمانہ بھی عائد کردیا۔