ٹی ٹوئنٹی ورلڈکپ کی فاتح ٹیم آسٹریلیا کے کھلاڑیوں نے وطن پہنچنے پر پریس کانفرنس کے دوران ٹورنامنٹ میں اپنی انجریوں سے متعلق انکشافات کیے۔
وطن واپس پہنچنے پر ٹی ٹوئنٹی چیمپئن ٹیم آسٹریلیا کے کھلاڑیوں نے پریس کانفرنس کی جس دوران میتھیو ویڈ نے انکشاف کیا کہ وہ ورلڈکپ فائنل مس کرنے کے بالکل قریب تھے اور انہوں نے نیوزی لینڈ کے خلاف فائنل سائیڈ اسٹرین کی گریڈ ٹو تکلیف کے ساتھ کھیلا۔
ویڈ کا کہنا تھا کہ انہیں اس قدر تکلیف تھی کہ وارم اپ کے دوران ہٹنگ کرنا ممکن نہیں تھا، فائنل کی رات پریشانی میں گزاری کہ شاید وہ فائنل میں حصہ نہ لے سکیں، وہ پریشان تھے کہ اگر آسٹریلیا نے پہلے بیٹنگ کی اور ہٹنگ کرنا پڑی تو وہ کیا کریں گے۔
اس موقع پر گلین میکسویل نے بتایا کہ میتھیو ویڈ نے وارم اپ کے دوران انجری چھپانے کی ناکام کوشش کی، وارم اپ کے دوران دیکھ کر سب کو میتھیو ویڈ کی انجری کا علم ہو گیا۔
دورانِ پریس کانفرنس ایرون فنچ نے کہا کہ گھٹنے کی تکلیف کی وجہ سے ورلڈکپ کے دوران آرام دہ محسوس نہیں کر رہا تھا اور میچ کے بعد کھلاڑی مجھے اسپرے کیا کرتے تھے۔
واضح رہےکہ آسٹریلیا نے ٹی ٹوئنٹی ورلڈکپ کے فائنل میں نیوزی لینڈ کو شکست دےکر پہلی بار ٹائٹل اپنے نام کیا۔