پاکستان
Time 23 ستمبر ، 2017

سانحہ ماڈل ٹاؤن رپورٹ: حکومت کی انٹرا کورٹ اپیل پر 2 رکنی بینچ قائم

لاہور ہائیکورٹ کے قائم مقام چیف جسٹس نے سانحہ ماڈل ٹاؤن کی رپورٹ منظر عام پر لانے کے فیصلے کے خلاف پنجاب حکومت کی اپیل پر 2 رکنی بینچ تشکیل دے دیا۔

لاہورہائیکورٹ نے گزشتہ روز سانحہ ماڈل ٹاؤن کی جوڈیشل رپورٹ منظر عام پر لانے کا حکم دیا تھا جس پر پنجاب حکومت نے جسٹس مظاہر نقوی کے فیصلے کو چیلنج کرتے ہوئے انٹرا کورٹ اپیل دائر کی تھی اور عدالت نے پنجاب حکومت کی اپیل پر 2 رکنی بینچ تشکیل دے دیا ہے۔

جیونیوز کے مطابق لاہور ہائیکورٹ کے قائم مقام چیف جسٹس نے پنجاب حکومت کی انٹرا کورٹ پر اپیل پر 2 رکنی بینچ تشکیل دےدیا ہے جو جسٹس عبدالسمیع خان اور جسٹس شہباز رضوی پر مشتمل ہے۔

واضح رہے کہ پاکستان عوامی تحریک نے لاہور ہائیکورٹ کے فیصلے کے بعد رپورٹ عام نہ کرنے پر پنجاب حکومت کے خلاف توہین عدالت کی درخواست بھی دائر کی ہے۔

جون 2014 میں لاہور کے علاقے ماڈل ٹاؤن میں پیش آنے والے واقعے میں پاکستان عوامی تحریک کے 14 کارکنان جاں بحق ہوئے تھے جس پر جسٹس باقر نجفی کی سربراہی میں جوڈیشل کمیشن نے انکوائری کی تھی تاہم اس انکوائری رپورٹ کو عام نہیں کیا گیا۔


مزید خبریں :