'ریس 3' کی شوٹنگ کے دوران مشتعل افراد کا حملہ، سلمان خان کو قتل کی دھمکی

ممبئی: بالی وڈ اداکار سلمان خان کی رواں برس عید پر ریلیز ہونے والی فلم 'ریس 3' کی شوٹنگ کے دوران مشتعل افراد نے سیٹ پر حملہ کردیا اور دبنگ خان کو قتل کی دھمکیاں بھی دی گئیں۔

ہندوستان ٹائمز کی رپورٹ کے مطابق مشتعل افراد نے سلمان خان پر اُس وقت حملہ کیا جب وہ اپنی ساتھی اداکارہ جیکولین فرنینڈز کے ساتھ فلم کے ایک گانے کی شوٹنگ میں مصروف تھے۔

واقعے کی اطلاع ملتے ہی بھارتی پولیس موقع پر پہنچ گئی اور فلم ساز رمیش ترانی کو فلم کی شوٹنگ روکنے کو کہا، جس کے باعث فوری طور پر فلم کی شوٹنگ ملتوی کردی گئی۔

جودھ پور کے گینگسٹر کی سلمان خان کو قتل کی دھمکی

دھمکی کے بعد سلمان خان کی سیکیورٹی میں اضافہ کردیا گیا ہے

دوسری جانب پولیس نے صورت حال پر قابو پاکر سلمان خان کو بحفاظت ان کے گھر پہنچا دیا۔

واضح رہے کہ سلمان خان کو بھارتی ریاست راجستھان کے شہر جودھ پور کے مقامی بدمعاش لارنس بشنوئی نے قتل کرنے کی دھمکی دی تھی، جو اس وقت پولیس کی حراست میں ہے۔

سلمان خان چند روز قبل کالے ہرن کے غیر قانونی شکار کے مقدمے کے سلسلے میں جودھ پور کی عدالت میں پیش ہوئے تھے جب کہ گینگسٹر کی دھمکی کے بعد سلمان خان کی سیکیورٹی میں بھی اضافہ کردیا گیا تھا۔

رپورٹس کے مطابق مذکورہ گینگسٹر کا تعلق راجھستان کی ایک ایسی برادری سے ہے جو کالے ہرن کو مقدس مانتی ہے۔

امکان ظاہر کیا جارہا ہے کہ حملہ کرنے والے گروپ کا تعلق گینگسٹر لارنس بشنوئی سے ہی ہے۔