پاکستان
Time 13 جنوری ، 2018

الیکشن میں عوام کا فیصلہ سر آنکھوں پر ہو گا: وزیراعظم

پشاور: وزیر اعظم شاہد خاقان عباسی  نے کہا ہے کہ انقلاب باتوں اور دعوؤں سے نہیں بلکہ کام کرنے سے آتا ہے اور مسلم لیگ ن کی حکومت کام کرکے دکھایا ہے۔

وزیراعظم شاہد خاقان عباسی کا اینکوبیشن سینٹر کی افتتاحی تقریب سے خطاب کرتے ہوئے کہنا تھا کہ چار پانچ ماہ بعد الیکشن میں عوام کا جو بھی فیصلہ آیا سر آنکھوں پر ہو گا، ہم کام کریں گے تو آگے بڑھیں گے ورنہ گھر جائيں گے۔

انہوں نے کہا کہ  ہر پاکستانی کو تیز رفتار انٹرنیٹ کی سہولت فراہم کی جائے گی، آنے والے وقت میں پورا پاکستان ڈیجیٹل سہولیات کے ساتھ کام کرے گا جس سے روزگار کے مواقع بڑھیں گے۔

ان کا کہنا تھا کہ براڈ بینڈ انٹرنیٹ مستقبل کی ضرورت ہے۔

وزیراعظم شاہد خاقان عباسی کااینکوبیشن سینٹر کو سراہتے ہوئے کہنا تھا کہ ہم امید کرتے ہیں کہ ادارہ سنگ میل ثابت ہوگا۔

ان کا کہنا تھا کہ نیشنل اینکوبیشن سینٹر کا یہ منصوبہ نوجوانوں کی ضرویات اور مستقبل کی ضروریات کو پورا کرتا ہے۔

انہوں نے بتایا کہ حکومت نے براڈ بینڈ کی فراہمی پر اربوں روپے خرچ کیے ہیں یہی وجہ ہے یہی وجہ ہے کہ آج مہمند ایجنسی پوری دنیا سے رابطے میں ہیں۔

انہوں نے کہا کہ مسلم لیگ ن کی حکومت سے قبل تھری جی اور فور جی کے لائسنسوں کی نیلامی پر پیسے بنانے کی کوشش کی جا رہی تھی مگر ان کی حکومت نے تھری جی اور فور جی کے لائسنس شفاف طریقے سے دیے۔

علاوہ ازیں وزیراعظم شاہد خاقان عباسی نے سپریم کورٹ اور پشاورہائی کورٹ کا دائرہ اختیار فاٹا تک بڑھانے کے بل کی منظوری پر قوم کو مبارکباد دی ہے۔

انہوں نے کہا کہ عدالتوں کو فاٹا تک توسیع دینے کا عمل قبائلی علاقوں میں اصلاحات کے سلسلے میں پہلا قدم ہے، قومی اسمبلی سے بل کا پاس ہونا فاٹا کے عوام کے لیے ایک تاریخی لمحہ ہے ۔

وزیراعظم نے کہا کہ فاٹا کے عوام کو قانونی حقوق ملنے پر انہیں مبارکباد دیتاہوں۔


مزید خبریں :