لاہور قلندرز کے کپتان برینڈن میکولم نے دبئی میں ٹیم کو جوائن کرلیا

دبئی: لاہور قلندرز کے کپتان برینڈن میکولم نے دبئی پہنچ کر ٹیم کو جوائن کرلیا۔

لاہور قلندرز کی مینجمنٹ نے ایئرپورٹ پر برینڈن میکولم کا استقبال کیا جس کے بعد وہ ہوٹل پہنچ گئے۔

لاہور قلندرز میں شامل پاکستانی کھلاڑی گزشتہ روز دبئی پہنچے تھے، جہاں کچھ آرام کے بعد کھلاڑی پریکٹس کریں گے۔ 

ایونٹ کا باقاعدہ آغاز دفاعی چیمپئن پشاور زلمی اور ایونٹ میں پہلی مرتبہ حصہ لینے والی ملتان سلطانز کے درمیان 22 فروری کو کھیلے جانے والے میچ سے ہوگا جو پاکستانی وقت کے مطابق رات 10 بجے کھیلا جائے گا۔

پی ایس ایل کے تیسرے ایڈیشن میں اسلام آباد یونائیٹیڈ، کوئٹہ گلیڈی ایٹرز، پشاور زلمی، کراچی کنگز، لاہور قلندرز اور ملتان سلطانز کی ٹیمیں حصہ لیں گی۔

پی بی سی کے شیڈول کے مطابق ایونٹ کے تمام 34 میچز 4 مختلف وینیوز پر ہوں گے، جن میں دبئی، شارجہ، لاہور اور کراچی شامل ہیں۔

غیرملکی سیکیورٹی ماہرین کا پی ایس ایل فائنل کے انتظامات پر اظہار اطمینان

سکیورٹی انتظامات بین الاقوامی معیار کے ہیں، 7 روز میں رپورٹ دوں گا، رگ ڈیکاسن

ایونٹ کے تین میچز پاکستان میں کھیلے جائیں گے، دو میچز لاہور اور فائنل کراچی کے نیشنل اسٹیڈیم میں کھیلا جائے گا۔

حال ہی میں غیرملکی سیکیورٹی ماہرین نے پی ایس ایل فائنل کے لئے کیے جانے والے سیکیورٹی انتظامات پر اطمینان کا اظہار کیا اور اسے بین الاقوامی معیار کا قرار دیا۔

سیکیورٹی ماہر رگ ڈیکاسن کا سیکیورٹی اقدامات کا جائزہ لینے کے بعد پریس کانفرنس کے دوران کہنا تھا کہ پی ایس ایل کے لیے سیکیورٹی انتظامات پہلا قدم ہے جس سے مطمئن ہوں اور اس حوالے سے 7 روزمیں رپورٹ دوں گا۔