پاکستان نے اپنے سفارتکاروں کو ہراساں کیے جانے کے شواہد بھارت کو فراہم کردیئے

اسلام آباد: ترجمان دفتر خارجہ ڈاکٹر فیصل کا کہنا ہےکہ بھارت میں پاکستانی سفارت کاروں کی ہراسگی کے شواہد بھارت کو فراہم کردیئے ہیں۔

اسلام آباد میں ہفتہ وار بریفنگ کے دوران ترجمان دفتر خارجہ نے وزیراعظم شاہد خاقان عباسی کے دورہ امریکا پر آگاہ کرتے ہوئے کہا کہ وزیراعظم نےامریکا کے نجی دورے میں امریکی نائب صدرمائیک پینس سے ملاقات کی جس میں امریکا میں تعینات دفاعی مشیر بھی موجود تھے۔

ترجمان دفتر خارجہ نے کہا کہ پاکستان میں اب دہشت گردوں کو کوئی منظم وجود نہیں ہے، امریکا انٹیلی جنس معلومات فراہم کرے تو کارروائی کریں گے۔

سفراء کو ہراساں کرنے کے واقعات: نئی دلی سے پاکستانی ہائی کمشنر مشاورت کیلئے طلب

اپنے سفراء کا تحفظ ہمارے لئے اہم ہے اس سے پیچھے نہیں ہٹیں گے، بھارت ہمیں اپنی اندرونی سیاست میں ملوث و استعمال نہ کرے، ترجمان دفتر خارجہ

ڈاکٹر فیصل نے بھارت میں پاکستانی سفارت کاروں کو ہراساں کیے جانے کے معاملے پر بات کرتے ہوئے کہا کہ پاکستان کو اپنے سفارت کاروں کی بھارت میں ہراسگی پر تحفظات ہیں، اس حوالے سے پاکستان نے تمام شواہد بھارت کو فراہم کیے ہیں جب کہ آج بھارت میں پاکستانی ہائی کمشنر سہیل محمود واپس روانہ ہوجائیں گے۔

ترجمان دفتر خارجہ نے خواجہ معین الدین چشتی کے عرس میں شرکت کے لیے پاکستانی زائرین کو بھارت کی جانب سے ویزہ نہ دینے پر مایوسی کا اظہار کیا۔

افغان صدر کی جانب سے وزیراعظم پاکستان کو دورہ افغانستان کی دعوت پر ترجمان کا کہنا تھا تھا کہ اس دعوت کا جائزہ لیا جارہا ہے، افغان صدر کی دعوت مثبت پیش رفت ہے، جلد افغان حکام کو جواب سے آگاہ کردیں گے۔