'دش اش یوور پائلٹ شپیکنگ' نشے میں دھت برطانوی پائلٹ کو ہتھکڑی لگ گئی

لندن: برطانوی ایئرلائن 'برٹش ایئرویز' کے نشے میں دھت پائلٹ کو عملے کی شکایت پر ہتھکڑی لگا کر کاکٹ پٹ سے نکال دیا گیا۔

49 سالہ پائلٹ جولیان موناگن کو 300 مسافروں کو 12 گھنٹے کی پرواز سے موریطانیہ لے کر جانا تھا لیکن اڑان بھرنے سے قبل پائلٹ کو جھولتا دیکھ کر عملے نے تشویش کا اظہار کیا۔ 

اور یہ تشویش اس وقت بام عروج پر پہنچی جب موصوف پائلٹ نے اڑان بھرنے کی تیاری کی اور کہا 'دش اش یوور پائلٹ شپیکنگ' جس پر عملے نے فوری طور پر پولیس کو اطلاع دی۔

تمام مسافر پرواز کے اڑنے کا انتظار کر رہے تھے کہ اس دوران پولیس اہلکار تیزی سے طیارے میں داخل ہوئے اور کاک پٹ سے نشے میں دھت پائلٹ کو ہتھکڑی لگا کر اپنے ہمراہ لے گئے۔

مسافر تھوڑی دیر کے لیے حواس باختہ ہوگئے کہ آخر یہ کیا ڈرامہ ہورہا ہے، ایک مسافر نے بتایا کہ انہیں کچھ سمجھ نہیں آیا کہ اچانک کیا ہوا۔