کابل میں ووٹر رجسٹریشن سینٹر پر خودکش حملہ، 57 افراد ہلاک

کابل: افغان دارالحکومت کابل میں ووٹر رجسٹریشن سینٹر پر خودکش حملے کے نتیجے میں 57 افراد ہلاک اور 119 سے زائد زخمی ہوگئے۔

غیرملکی خبر رساں ادارے کے مطابق افغان شہری کابل میں واقع ووٹر اور شناختی کارڈ سینٹر کے باہر اپنی باری کا انتظار کر رہے تھے کہ خودکش بمبار نے خود کو شہریوں کے قریب جا کر دھماکے سے اڑا دیا۔

کابل پولیس چیف جنرل داؤد امین کے مطابق خودکش حملہ آور کا ہدف عام شہری تھے جس نے شناخی کارڈ حاصل کرنے والے شہریوں کے قریب جا کر خود کو دھماکے سے اڑایا۔

افغان چیف ایگزیکٹو عبداللہ عبداللہ نے خودکش حملے کی مذمت کرتے ہوئے کہا کہ وہ متاثرہ افراد کے ساتھ ہیں، منصفانہ اور شفاف انتخابات کے لئے ہماری کوششیں جاری رہیں گی اور دہشت گرد اپنی مرضی عوام پر مسلط نہیں کرسکیں گے۔ 

پاکستان کی مذمت

ادھر پاکستان نے کابل اور بغلان میں ہونے والے خودکش دھماکوں کی شدید الفاظ میں مذمت کی ہے۔

ترجمان دفتر خارجہ محمد فیصل نے کہا کہ پاکستان جاں بحق اور زخمی ہونے والے افراد کے اہل خانہ سے ہمدردی کا اظہار کرتا ہے۔

ان کا کہنا تھا کہ پاکستان ہر قسم کی دہشت گردی کی مذمت کرتا ہے، دھماکوں میں زخمی ہونے والوں کی صحت یابی کیلئے دعا گو ہیں۔