اقتصادی رابطہ کمیٹی نے رمضان ریلیف پیکج 2018 کی منظوری دے دی

26 اپریل ، 2018

جن اشیائے ضروریہ پر سبسڈی دی جائے گی ان میں آٹا، چینی، خوردنی تیل و گھی، دالیں، بیسن، کھجور، چاول، اسکواشز، دودھ اور چائے شامل ہیں — فوٹو: فائل

اسلام آباد: وفاقی کابینہ کی اقتصادی رابطہ کمیٹی (ای سی سی) نے یوٹیلٹی اسٹورز کارپوریشن کی طرف سے فراہم کردہ 19 اشیائے ضروریہ کے لیے رمضان ریلیف پیکج 2018ءکی منظوری دے دی۔

وزیراعظم شاہد خاقان عباسی کی زیر صدارت ای سی سی کا اجلاس وزیراعظم آفس میں منعقد ہوا۔ اجلاس نے رمضان ریلیف پیکج کے تحت جن اشیائے ضروریہ پر سبسڈی دی جائے گی ان میں آٹا، چینی، خوردنی تیل و گھی، دالیں، بیسن، کھجور، چاول، اسکواشز، دودھ اور چائے شامل ہیں۔

حکومت اس پیکیج کے تحت ایک ارب 73 کروڑ 30 لاکھ روپے کی سبسڈی فراہم کرے گی۔ وزیراعظم نے ہدایت کی کہ رمضان پیکیج کے تحت روزمرہ استعمال کی اشیاء مارکیٹ سے کم نرخوں پر فراہم کی جانی چاہئیں۔

ای سی سی نے 660 کلو واٹ ایچ وی ڈی سی مٹیاری ۔ لاہور ٹرانسمیشن لائن کی فنانشل کلوزنگ تاریخ میں پرفارمنس گارنٹی کی رقم دگنا کئے بغیر سات ماہ یعنی یکم دسمبر 2018ءتک توسیع کی بھی منظوری دی۔ یہ فیصلہ تھر اور کراچی کے قریب کوئلے سے چلنے والے بجلی کے آئندہ منصوبوں اور کراچی میں 1100 میگاواٹ کے ٹو پراجیکٹ کی الائنمنٹ کے لئے کیا گیا ہے۔

مالی سال 18-2017 کے لئے تمباکو کے سیس ریٹس پر نظرثانی کی بھی منظوری دی گئی۔ قومی اقتصادی کمیٹی نے پاسکو کو سمندری راستے کے ذریعے 155 ڈالر فی ٹن کے ری بیٹ پر 5 لاکھ ٹن فاضل گندم برآمد کرنے کی بھی منظوری دے دی۔