عمران خان کو لاہور میں بری طرح شکست دوں گا، خواجہ سعد رفیق

پاکستان مسلم لیگ (ن) کے رہنما اور سابق وفاقی وزیر ریلوے خواجہ سعد رفیق کا کہنا ہے کہ پاکستان تحریک انصاف کے چیئرمین عمران خان کو لاہور کے حلقہ این اے 131 سے بری طرح شکست دوں گا۔

سابق وفاقی وزیر ریلوے خواجہ سعد رفیق کا سماجی رابطے کی ویب سائٹ ٹوئٹر پر اپنے بیان میں کہنا تھا کہ ہمارے مخالفین کی انتخابی مہم جھنڈوں اور پینافلیکسوں پر ہے، وہ افتتاحی مہم کے دوران 200 کارکن بھی نہیں اکٹھے کر سکے لیکن ہم ہر روز 100 گلیوں میں جاتے ہیں اور ہر گلی میں 200 ووٹرز ہمارے ساتھ ہوتے ہیں۔

انہوں نے کہا کہ عمران خان تُم لاہور سے بُری طرح ہارو گے اور ڈھونڈتے پھرو گے کہ تمہیں لاہور کے اس حلقے میں دھکا کس نے دیا تھا۔

سابق وفاقی وزیر ریلوے کا ٹوئٹ میں کہنا تھا کہ ملکی مسائل کا حل مسلم لیگ (ن) کے پاس ہے اور بڑے ڈیم بھی وہی بنائیں گے جنہوں نے دہشت گردی اور لوڈ شیڈنگ پر قابو پایا، جنہوں نے ریلوے کو بحال کیا اور لواری ٹنل جیسے عشروں سے زیر تکمیل منصوبے مکمل کیے۔

ان کا کہنا ہے کہ میرا مخالف جھوٹا بھی ہے اور بُزدل بھی، یہ عدلیہ بحالی تحریک میں اس وقت جا کے چھپ گیا تھا جب مسلم لیگ ن نواز شریف کی قیادت میں سڑکوں پر تھی۔ 

اپنی ٹوئٹ میں ان کا کہنا تھا کہ آئین اور جمہوریت کے لئے ماریں ہم کھائیں، قومی اور عوامی مسائل ہم حل کریں اور دودھ کوئی بلا آ کے پی جائے، ہم ایسا نہیں ہونے دیں گے۔

انہوں نے کہا کہ ہم قومی اداروں کا احترام کرتے ہیں اور چاہتے ہیں کہ عوام کی نمائندہ پارلیمنٹ کا بھی احترام کیا جائے جو مدر آف انسٹی ٹیوشنز ہے جب کہ ہم امید کرتے ہیں کہ دھونس اور دھاندلی کی اطلاعات کا نوٹس لیا جائے گا، نگران حکومت کی طرف سے آزادانہ اور منصفانہ انتخابات کو یقینی بنایا جائے گا۔

خواجہ سعد رفیق کا کہنا تھا کہ پٹرولیم مصنوعات کی قیمتوں میں اضافے اور روپے کی قیمت میں کمی کی ذمہ داری مسلم لیگ (ن) پر کسی طور عائد نہیں کی جاسکتی، لہذا بے بنیاد پروپیگنڈہ نہ کیا جائے اور معیشت کی ذمہ داری جب تک مسلم لیگ (ن) کے پاس رہی روپے کی قیمت اور زرمبادلہ کے ذخائر مستحکم رہے۔

ان کا کہنا ہے کہ اب سب کو علم ہو گیا کہ اسحاق ڈار باصلاحیت، محب وطن اور عوام دوست وزیر خزانہ تھے جن کے معترف عالمی ادارے بھی ہیں جب کہ مہنگائی اور معیشت کی ابتری کی ذمہ داری دھرنے دینے والے اسد عمر اور ان کے سازشی ساتھیوں پر عائد ہوتی ہے جو اب مگر مچھ کے آنسو بہا رہے اور جھوٹ بولنے کے ریکارڈ قائم کر رہے ہیں۔

عمران خان پانچوں حلقوں سے شکست ہونے تک انسان نہیں بنیں گے، سعد رفیق

الیکشن میں عمران خان اور ان کے ساتھ والوں کو سبق سکھانا ضروری ہے، سابق وفاقی وزیر ریلوے

سابق وفاقی وزیر کا ٹوئٹ میں کہنا تھا کہ نواز شریف کی حکومت میں پیٹرول 70 روپے لٹیر رہا اور  پیٹرول درآمد کرنے والے ملکوں میں سب سے سستا پیٹرول پاکستان میں رہا جس پر سب کو شکریہ نواز شریف کہنا چاہیے۔

یاد رہے کہ عام انتخابات 2018 کے موقع پر لاہور کے حلقے این اے 131 پر پاکستان تحریک انصاف کے چیئرمین عمران خان کے مدمقابل خواجہ سعد رفیق ن لیگ کے امیدوار ہیں۔