کھیل
Time 18 جولائی ، 2018

زمبابوے کو تیسرے ون ڈے میں شکست: گرین شرٹس کو سیریز میں 0-3 کی فیصلہ کن برتری

اوپننگ بلے باز امام الحق پہلے اوور کی پہلی ہی گیند پر کیچ آؤٹ ہوکر پویلین لوٹ گئے۔ فوٹو: فائل

بلاوائیو: قومی کرکٹ ٹیم نے تیسرے ایک روزہ میچ میں زمبابوے کو 9 وکٹوں سے شکست دے کر 5 میچز پر مشتمل سیریز میں 0-3 کی فیصلہ کن برتری حاصل کرلی۔

کوئنز اسپورٹس کلب میں کھیلے گئے میچ میں میزبان ٹیم نے گرین شرٹس کو جیت کے لیے 68 رنز کا ہدف دیا جو گرین شرٹس نے ایک وکٹ کے نقصان پر حاصل کیا۔

ہدف کے تعاقب میں اوپننگ بلے باز امام الحق پہلے اوور کی پہلی ہی گیند پر بغیر کوئی رنز بنائے آؤٹ ہوئے جس کے بعد فخر زمان اور بابراعظم نے شاندار بیٹنگ کی اور ٹیم کو کامیابی دلائی۔

فخر زمان 43 اور بابر اعظم 19 رنز بنا کر ناٹ آؤٹ رہے، گرین شرٹس تیسرے میچ میں کامیابی کے بعد 5 ایک روز میچز کی سیریز میں فیصلہ کن برتری حاصل کرلی۔

اس سے قبل میزبان ٹیم کے کپتان ہیملٹن مساکدزا نے ٹاس جیت کر پہلے بیٹنگ کا فیصلہ کیا جو سود مند ثابت نہ ہوا اور پوری ٹیم 25.1 اوور میں 67 رنز بنانے کے بعد پویلین لوٹ گئی۔ 

چامو چی بھا بھا 16 اور کپتان ہیملٹن مساکدا 10 رنز بنا کر نمایاں رہے جب کہ 8 بلے باز ڈبل فیگر میں بھی شامل نہ ہوسکے۔

گرین شرٹس کی جانب سے فہیم اشرف نے شاندار بولنگ کا مظاہرہ کرتے ہوئے 5 شکار کیے جب کہ جنید خان نے 2، یاسر شاہ، شاداب خان اور عثمان خان نے ایک ایک وکٹ حاصل کی۔

تیسرے ایک روزہ میچ کے لیے قومی ٹیم میں دو تبدیلیاں کی گئیں، محمد عامر اور حسن علی کی جگہ جنید خان اور یاسر شاہ کو شامل کیا گیا۔ 

اسکواڈ میں شامل حارث سہیل ہمشیرہ کی طبیعت کی خرابی کے باعث واپس پاکستان آرہے ہیں تاہم ان کی جگہ اب تک کسی متبادل کو نہیں بلایا گیا۔

مزید خبریں :