کراچی میں جھولا گرنے کا معاملہ، پارک انتظامیہ نے تیکنیکی نقص تسلیم کرلیا

کراچی کے عسکری امیوزمنٹ پارک کی انتظامیہ نے گرنے والے جھولے میں تیکنیکی نقص کو تسلیم کر لیا۔

ذرائع کے مطابق ڈی سی ایسٹ احمد علی صدیقی کی سربراہی میں ایک ٹیم نے عسکری امیوزمنٹ پارک کا دورہ کیا جہاں انہوں نے ٹھیکداروں زبیر طفیل، محمد عمران سے سوالات کیے۔

ذرائع کے مطابق تحقیقاتی ٹیم نے پارک کے ٹھیکیداروں سے گرنے والے جھولے سے متعلق پوچھ گچھ بھی کی۔

کراچی میں عسکری پارک میں جھولا گرنے سے 14 سالہ لڑکی جاں بحق، 10 زخمی

لڑکی کا نام کشف بتایا گیا، اس کے علاوہ دو دیگر بچوں کی حالت تشویشناک بتائی جارہی ہے

ذرائع کا کہنا ہے کہ عسکری امیوزمنٹ پارک کے جھولوں پر ٹیکنکل رپورٹ کل تک مکمل کر لی جائےگی۔

دوسری جانب پارک انتظامیہ نے جھولے فراہم کرنے والی چینی کمپنی کو حادثے اور جھولوں میں تکنیکی نقص سے بھی آگاہ کر دیا ہے۔

جھولے کے حادثے میں جاں بحق ہونے والی بچی کشف کے والد صمد نے جیو نیوز سے گفتگو کرتے ہوئے کہا کہ مجھے کچھ نہیں چاہیے بس پارک کے انتظامات کو بہتر کیا جائے۔

خیال رہے کہ چند روز قبل کراچی کے عسکری امیوزمنٹ پارک میں جھولا گرنے سے 14 سالہ بچی کشف جاں بحق اور 10 افراد زخمی ہو گئے تھے۔