22 جولائی ، 2018
افغانستان کے دارالحکومت کابل میں نائب صدر رشید دوستم کے قافلے پر خود کش حملے کے نتیجے میں 14 افراد ہلاک اور درجنوں زخمی ہو گئے۔
افغان میڈیا کے مطابق دھماکہ افغانستان کے نائب صدر رشید دوستم کے خود ساختہ جلا وطنی ختم کر کے وطن واپس پہنچنے پر ہوا۔
رشید دوستم گزشتہ برس مئی میں خود ساختہ طور پر جلاوطن ہو کر ترکی چلے گئے تھے۔
کابل پولیس ترجمان کے مطابق دھماکہ حامد کرزئی انٹرنیشنل ایئرپورٹ کے داخلی دروازے پر ہوا جہاں بڑی تعداد میں لوگ رشید دوستم کا استقبال کرنے کے لیے موجود تھے۔
رشید دوستم کے ترجمان بشیر احمد ترنج کے مطابق دھماکے کے نتیجے میں رشید دوستم کے استقبال کے لیے آئی متعدد گاڑیوں کو نقصان پہنچا تاہم بکتر بند گاڑی میں ہونے کی وجہ سے افغانستان کے نائب صدر محفوظ رہے۔
افغان وزارت داخلہ کے ترجمان کے مطابق کابل ایئرپورٹ کے قریب ہونے والے خود کش حملے میں 14 افراد ہلاک اور 60 زخمی ہوئے۔