کلثوم نواز کے انتقال کے بعد فیصلے کا آنا شریف خاندان کیلئے ریلیف ہے، بلاول

لاہور: چیئرمن پیپلزپارٹی بلاول بھٹو زرداری کا کہنا ہے کہ بیگم کلثوم نواز کے انتقال کے بعد اسلام آباد ہائیکورٹ سے فیصلے کا آنا شریف خاندان کیلئے ریلیف ہے۔

بلاول بھٹو زرداری کا اسلام آباد ہائیکورٹ کے فیصلے کے ردعمل پر کہنا تھا کہ  پیپلزپارٹی اور شہید محترمہ بینظیر نے ہمیشہ عدلیہ کی آزادی کی لڑائی لڑی ہے اور پیپلز پارٹی عدلیہ کی آزادی کی جدوجہد کا ہراول دستہ رہی ہے۔

انہوں نے کہا کہ اپنی جدوجہد کے باوجود پیپلزپارٹی نے عدالتی فیصلوں کا سامنا کیا اور فیصلے خلاف آنے کے باوجود کبھی عدالتوں کو بےتوقیر نہیں کیا۔

اڈیالہ جیل سے رہائی کے بعد نواز شریف، مریم اور کیپٹن (ر) صفدر لاہور کیلئے روانہ

اسلام آباد ہائیکورٹ کے جسٹس اطہر من اللہ نے فیصلہ پڑھ کر سنایا، کمرہ عدالت میں لیگی رہنماؤں کے نعرے، گلے مل کر ایک دوسرے کو مبارکبادیں دیں۔

ان کا کہنا تھا کہ بیگم کلثوم کے انتقال کی وجہ سے شریف خاندان مشکل وقت سے گزر رہا تھا اور اس فیصلے کا آنا شریف خاندان کے لیے ایک ریلیف ہے۔

انہوں نے کہا کہ ہم فیصلے کے قانونی پہلوؤں پر کوئی رائے نہیں دے سکتے تاہم اسلام آباد ہائیکورٹ کے فیصلے پر اپیلوں کے مراحل ابھی باقی ہیں۔

پی پی چیئرمین کا کہنا تھا کہ ہمیں یقین ہےکہ عدالتیں کسی کے خلاف سیاسی انتقام کے عمل کا حصہ نہیں ہیں، جمہوری نظام آگے بڑھانے کے لیے قانون کی حکمرانی اور عدلیہ کی آزادی لازمی جُز ہے۔

یاد رہے کہ اسلام آباد ہائیکورٹ نے احتساب عدالت کی جانب سے دی گئی سزائیں معطل کردیں ہیں اور معطلی درخواستیں منظور کرتے ہوئے سابق وزیر اعظم نواز شریف، بیٹی مریم نواز اور داماد کیپٹن (ر) محمد صفدر کو ضمانت پر رہا کرنے کا حکم دیا ہے۔

واضح رہے کہ اسلام آباد کی احتساب عدالت نمبر ایک کے جج محمد بشیر نے رواں برس 6 جولائی کو ایون فیلڈ ریفرنس میں نواز شریف کو 10 سال قید اور جرمانے، مریم نواز کو 7 سال قید اور جرمانے اور کیپٹن ریٹائرڈ محمد صفدر کو ایک سال قید کی سزا سنائی تھی۔