پاکستان
Time 12 اکتوبر ، 2018

35 حلقوں میں ضمنی الیکشن کے لیے انتخابی مہم کا آخری روز

قومی اسمبلی کی 10 اور صوبائی اسمبلیوں کی 25 نشستوں پر ضمنی انتخابات 14 اکتوبر کو ہوں گے۔ فوٹو: فائل

اسلام آباد: قومی و صوبائی اسمبلیوں کے 35 حلقوں میں ضمنی الیکشن کے لیے انتخابی مہم کا آج آخری روز ہے اور پہلی بار سمندر پار پاکستانی بھی حق رائے دہی استعمال کریں گے۔ 

الیکشن کمیشن کے مطابق 14 اکتوبر کو قومی اسمبلی کی 10، پنجاب اسمبلی کی 12، خیبر پختونخوا اسمبلی کی 9، سندھ اور خیبرپختونخوا اسمبلی کی 2،2 نشستوں پر ضمنی انتخابات ہونا ہیں۔ 

ضمنی انتخابات کے لیے اسلام آباد، لاہور اور کراچی سمیت دیگر شہروں میں سیاسی سرگرمیاں زوروں پر ہے اور آج انتخابی مہم کے آخری روز نامزد امیدوار عوام سے ووٹ مانگیں گے۔

لاہور کے حلقہ این  اے 131 میں مسلم لیگ (ن) کے خواجہ سعد رفیق اور تحریک انصاف کے ہمایوں اختر میں مقابلہ ہے جب کہ سابق وزیراعظم شاہد خاقان عباسی  این اے 124 لاہور سے میدان میں جن کا مقابلہ پی ٹی آئی کے غلام محی الدین کریں گے۔ 

کراچی کے حلقہ این اے 243 میں تحریک انصاف اور متحدہ قومی موومنٹ کے امیدواروں کے درمیان کانٹے کے مقابلے کی توقع ہے، ایم کیو ایم مرکز میں تحریک انصاف کی حکومت کا حصہ بھی ہے۔