ٹیلیفون پرمعلومات لے کراکاؤنٹس سے رقم نکالنے والے گروہ کا اہم رکن گرفتار

گوجرانوالہ میں ٹیلیفون پر معلومات لے کر بینک اکاونٹس سے رقم نکالنے والے گروہ کے اہم رکن کو حافظ آباد سےگرفتار کرلیا گیا۔

ایف آئی اے حکام کا کہنا ہے گوجرانوالہ ریجن میں اس گروہ نے شہریوں سے ٹیلیفون پر معلومات حاصل کرنے کے بعد 60 سے زائد بینک اکاؤنٹس سےکروڑوں روپے نکالے۔

ایف آئی اے کے مطابق بینک فراڈ میں ملوث شبیر نامی اہم ملزم کو حافظ آباد سےگرفتار کیا گیا جسے پہلے سے گرفتار ملزم شفیق کی نشاندہی پر گرفتار کیا۔ 

اسسٹنٹ ڈائریکٹر ایف آئی اے آصف اقبال کا کہنا ہے کہ ملزم شفیق 28 ستمبر کو حافظ آباد میں بینک سے رقم نکلواتے پکڑا گیا تھا جس سے بینک فراڈ کے بین الصوبائی گروہ کے بارے میں اہم معلومات ملیں۔

ہوشیار رہیں ! آن لائن بینکنگ فراڈ کا جِن ملک بھر میں بے قابو ہوگیا

آن لائن فراڈ کے واقعات میں گزشتہ تین مہینوں میں تیزی آئی ہے، اگست، ستمبر اور اکتوبر میں صرف خیبر پختونخوا میں 220 افراد نشانہ بنے، 100 افراد تو صرف پشاور ریجن میں شکار ہوئے

آصف اقبال کے مطابق 3 ماہ میں 60 بینک اکاؤنٹس سے نکالی گئی رقم کروڑوں روپے ہے اور متاثرہ افراد میں وکلاء، پولیس افسران اور پروفیسرز بھی شامل ہیں۔

ملزمان نے گوجرانوالہ ریجن میں 60 شہریوں کے اکاؤنٹس سے رقم نکلوائی جب کہ اٹک کے رہائشی اللہ یار کے اکاؤنٹ سے 5 لاکھ روپےکی رقم ٹرانسفر کی گئی۔

بعد ازاں ایف آئی اے نے ملزم کو عدالت میں پیش کیا اور عدالت نے ملزم کو جوڈیشل ریمانڈ پر جیل بھجوادیا۔