اسد عمر سے اختلافات کی خبریں من گھڑت ہیں: جہانگیر ترین

تحریک انصاف کے رہنما جہانگیر ترین نے وزیر خزانہ اسد عمر کے ساتھ اختلافات کی خبروں کو من گھڑت قرار دے دیا۔

فیصل آباد میں صحافیوں سے بات کرتے ہوئے جہانگیر ترین کا کہنا تھا کہ تحریک انصاف کی حکومت کو ابھی صرف تین مہینے ہوئے ہیں اور لوگوں نے تنقید شروع کر دی ہے۔

ان کا کہنا تھا کہ تحریک انصاف عوام سے کیے گئے اپنے وعدے پورے کرے گی، جنوبی پنجاب صوبہ ضرور بنے گا لیکن صوبہ ایک سیکنڈ میں نہیں بن سکتا۔

پاکستان کی فوج پی ٹی آئی کے منشورکے ساتھ کھڑی ہے، وزیراعظم

کوئی ایک فیصلہ ایسا نہیں جو میرا نہ ہو اور کوئی ایک فیصلہ ایسا نہیں جس کے پیچھے فوج نہ کھڑی ہو، خارجہ امور سے متعلق فیصلے خود کرتا ہوں، فوج جمہوری حکومت کے ساتھ کھڑی ہے، عمران خان کی سینیئر صحافیوں سے خصوصی گفتگو

انہوں نے کہا کہ قیام پاکستان کے بعد سے آج تک پاکستان میں کوئی نیا صوبہ نہیں بنا، نیا صوبہ بنانے کے لیے جو بھی مسائل ہیں انہیں مل کر حل کریں گے۔

وزیراعطم کی جانب سے قبل از وقت انتخابات سے متعلق سوال پر جہانگیر ترین کا کہنا تھا کہ وزیراعظم کی قبل ازوقت انتخابات کی بات سوال کے تناظر میں تھی، اگر قبل از وقت انتخابات ہوئے بھی تو پی ٹی آئی ہی جیتے گی۔

جہانگیر ترین سے جھگڑے اور استعفے کی خبریں بے بنیاد ہیں، اسد عمر

میڈیا کو غیرمصدقہ خبریں نشر نہیں کرنی چاہئیں، وزیر خزانہ، استعفے کی افواہ بعض عناصر اپنے مذموم مقاصد کے لیے اڑا رہے ہیں، ترجمان وزارت خزانہ

وفاقی وزیر خزانہ کے ساتھ اختلافات کے حوالے سے جہانگیر ترین کا کہنا تھا کہ اسد عمر کے ساتھ تنازع کی خبر بالکل من گھڑت اور غلط ہے، پچھلے دنوں ہم تین آدمیوں کی ایسی کوئی میٹنگ بھی نہیں ہوئی۔

وزیراعظم کی جانب سے کچھ وزراء کے استعفوں سے متعلق سوال پر جہانگیر ترین کا کہنا تھا کہ ان کے نام صرف عمران خان کو ہی پتہ ہوں گے۔