کھیل
Time 09 جنوری ، 2019

جنوبی افریقا کے خلاف ون ڈے سیریز کیلئے 16 رکنی قومی ٹیم کا اعلان


جنوبی افریقا کے خلاف 5 ایک روزہ میچوں کی سیریز کے لیے 16 رکنی قومی اسکواڈ کا اعلان کر دیا گیا ہے۔

پاکستان کرکٹ بورڈ کی سلیکشن کمیٹی نے جنوبی افریقا کے خلاف ون ڈے سیریز کے لیے محمد عامر اور محمد رضوان کو بھی شامل کیا ہے۔

جون 2017 میں ہونے والی چیمپئنز ٹرافی کے بعد سے اب تک محمد عامر نے 10 ایک روزہ میچوں میں صرف 100.66 کی اوسط سے صرف تین وکٹیں حاصل کی ہیں۔

چیف سلیکٹر انضمام الحق کا کہنا تھا کہ جنوبی افریقا کے خلاف ٹیسٹ میں بہترین پرفارمنس کے باعث عامر کو ایک روزہ سیریز میں شامل کیا گیا ہے جب کہ محمد عباس کو آرام دیا گیا ہے۔

اس کے علاوہ طلعت حسین اور شان مسعود کو بھی ون ڈے ٹیم میں شامل کیا گیا ہے جب کہ نیوزی لینڈ کے خلاف ایک روزہ میچوں کی سیریز میں شامل جنید خان اور آصف علی کو ڈراپ کر دیا گیا ہے۔

مڈل آرڈر بلے باز حارث سہیل گھٹنے کی انجری کی وجہ سے ٹیم میں شامل نہیں ہو سکے۔

قومی ٹیم کی قیادت وکٹ کیپر سرفراز احمد کریں گے جب کہ دیگر کھلاڑیوں میں بابر اعظم، فہیم اشرف، فخر زمان، حسن علی، عماد وسیم، امام الحق، محمد حفیظ اور شاداب خان شامل ہیں۔

شاہین شاہ آفریدی، شعیب ملک اور عثمان شنواری بھی جنوبی افریقا کے خلاف ون ڈے سیریز کے لیے ٹیم کا حصہ ہوں گے۔

پاکستان اور جنوبی افریقا کے درمیان پانچ ایک روزہ میچوں کی سیریز کا پہلا میچ 19 جنوری کو پورٹ ایلزبتھ میں کھیلا جائے گا۔

مزید خبریں :