خوش ہوں کوئی مجھے کسی بھی تقریب میں مدعو نہیں کرتا: اکشے کھنہ

لوگوں نے تقریب میں مدعو کرنا چھوڑدیا اور یہ مجھے پریشان نہیں کرتا، میں تو بہت خوش ہوں کہ اب ایسا ہوتا ہے کیونکہ وہ جانتے ہیں کہ میں کیسا ہوں، اداکار۔ فوٹو: فائل

بالی وڈ کے تنہائی پسند نامور اداکار اکشے کھنہ کا کہنا ہے کہ انہیں خوشی ہے کہ کوئی بھی اسٹار انہیں کسی بھی تقریب میں مدعو نہیں کرتا۔

بھارتی نیوز سائٹ دکن کرونیکل کی رپورٹ کے مطابق اکشے کھنہ کا کہنا ہے کہ سب سے اہم اپنے آپ میں ہونا ہوتا ہے جو میں ہوں اور میں اپنی یہ عادت تبدیل نہیں کرسکتا۔

اداکار نے بتایا کہ ’ لوگوں نے مجھے کسی بھی تقریب میں مدعو کرنا چھوڑ دیا ہے اور یہ مجھے پریشان نہیں کرتا کیوں کہ میں تو بہت خوش ہوں کہ اب ایسا ہوتا ہے، سب جانتے ہیں کہ میں کیسا ہوں‘۔

اکشے کھنہ کا کہنا تھا کہ میں اپنے بارے میں زیادہ بات نہیں کرنا چاہتا لیکن سچ میں مجھے ہنسانا بہت آسان ہے، مجھے مزاح پسند ہے اور کوئی مجھ پر جملے بازی کرے اس پر بھی میں مسکرا جاتا ہوں۔  

واضح رہے کہ اکشے کھنہ کی فلم ’ایکسیڈینٹل پرائم منسٹر‘ نمائش کیلئے پیش کی جاچکی ہے جس نے باکس آفس پر  پہلے روز 4 کروڑ 50 لاکھ بھارتی روپے کا کاروبار کیا ہے۔

سابق بھارتی وزیراعظم من موہن سنگھ کی زندگی پر بنی فلم میں اکشے کھنہ نے ان کے میڈیا مشیر سنجے بارو کا کردار کیا ہے۔


فلم میں سابق بھارتی وزیراعظم من موہن سنگھ کا مرکزی کردار انوپم کھیر نبھا رہے ہیں جن کے حوالے سے اکشے کھنہ کہتے ہیں کہ ’مجھے ان کے ساتھ مزہ آتا ہے تو میں زبردست کام کرتا ہوں، وہ آپ کو انٹرٹین رکھتے ہیں اور ہمیشہ خوش رہتے ہیں‘۔

اداکار کا مزید کہنا تھا کہ ان (انوپم) کی یہ فنکاری ایک اور زبردست کامیابی ہے اور مجھے فخر ہے کہ میں ان کے ساتھ کام کر رہا ہوں۔  

مزید خبریں :