وزیراعظم اور اماراتی ولی عہد کی ملاقات، دوطرفہ امور پر تبادلہ خیال

اسلام آباد: وزیراعظم عمران خان اور متحدہ عرب امارات کے ولی عہد شیخ محمد بن زید سے ملاقات کی جس کے دوران دوطرفہ تعلقات، مختلف شعبوں میں تعاون سمیت دیگر امور پر تبادلہ خیال کیا گیا۔

وزیراعظم عمران خان شیخ محمد بن راشد المکتوم کی دعوت پر ایک روزہ دورے پر دبئی کے رائل ٹرمینل پہنچے تو ابوظہبی کے ولی عہد شیخ محمد بن زید النہیان نے ان کا استقبال کیا۔

وزیراعظم کے ہمراہ وزیر خارجہ شاہ محمود قریشی، وزیر خزانہ اسد عمر، مشیر تجارت عبدالرزاق داؤد، معاون خصوصی ڈاکٹر عشرت حسین بھی ہیں۔

وفاقی وزیر اطلاعات فواد چوہدری اور معاون خصوصی برائے اوورسیز پاکستانیز ذوالفقار بخاری بھی وزیراعطم کے ہمراہ ہیں۔

‏وزیراعظم ساتویں عالمی حکومتی اجلاس سے خطاب بھی کریں گے اور پاکستان میں سرمایہ کاری کے مواقع پر روشنی ڈالیں گے۔

دبئی میں منعقد حکومتوں کے بارے میں عالمی سربراہ اجلاس 3 روز تک جاری رہے گا جس میں 140 ممالک سے 4,000 سے زائد ممتاز شخصیات شریک ہیں۔ 

اجلاس میں کئی ممالک کے سربراہان مملکت اور 30 بین الاقوامی تنظیموں کے اعلی حکام بھی شرکت کر رہے ہیں۔

آئی ایم ایف سے مسئلہ ڈیل کا نہیں ڈیل سےمتعلق شرائط کا ہے، فواد چوہدری

ورلڈ گورنمنٹ سمٹ کے بعد وزیر اعظم عمران خان دبئی میں آئی ایم ایف سربراہ سے ملاقات کریں گے جس سے ان کے مؤقف کو سمجھنے کا موقع ملے گا، فواد چوہدری

وزیر اعظم آفس کے اعلامیے کے مطابق عمران خان شیخ محمد بن راشد المکتوم کی دعوت پر ورلڈ گورنمنٹ سمٹ میں شرکت کر رہے ہیں اور اجلاس سے خطاب کریں گے۔

وزیر اعظم خطاب کے دوران مضبوط اور خوشحال پاکستان کے لیے اپنے وژن پر روشنی ڈالیں گے۔

وزیر اطلاعات فواد چوہدری کے مطابق  ورلڈ گورنمنٹ سمٹ کے بعد وزیر اعظم عمران خان آئی ایم ایف سربراہ سے بھی ملاقات کریں گے جس سے ان کے مؤقف سمجھنے کا موقع ملے گا اور ہمیں بھی اپنا موقف پیش کرنے کا موقع ملے گا۔