دنیا
Time 27 فروری ، 2019

مقبوضہ کشمیر میں بھارتی فوجی ہیلی کاپٹر گرکر تباہ، 6 اہلکاروں سمیت 7 افراد ہلاک

ہیلی کاپٹر میں تکنیکی خرابی کے باعث حادثہ پیش آیا، بھارتی حکام کا دعویٰ — فوٹو: اے ایف پی 

سری نگر: مقبوضہ کشمیر کے ضلع بڈگام میں بھارتی فوجی ہیلی کاپٹر گرکر تباہ ہوگیا جس کے نتیجے میں 6 فوجی اہلکاروں سمیت 7 افراد ہلاک ہوگئے۔

بھارتی میڈیا رپورٹس کے مطابق مقبوضہ کشمیر میں بھارتی ایئرفورس کے اہلکاروں کو لے کر جانے والا ایم آئی 17 ہیلی کاپٹر ضلع بڈگام کے علاقے جیرنڈ کلاں میں گرکر تباہ ہوگیا جس کے نتیجے میں بھارتی فضائیہ کے 6 اہلکار اور ایک شہری ہلاک ہوگئے۔

بھارتی حکام کے مطابق فوجی ہیلی کاپٹر کھلے میدان میں گرتے ہی دو ٹکرے ہوگیا جس میں آگ بھڑک اٹھی جب کہ حکام نے دعویٰ کیا کہ ہیلی کاپٹر میں تکنیکی خرابی کے باعث حادثہ پیش آیا۔

دوسری جانب کشمیر میڈیا سروس کے مطابق پاک فضائیہ کی جانب سے 2 بھارتی جنگی طیاروں کو مار گرانے اور پائلٹ کی گرفتاری کی خبر پھیلتے ہی مقبوضہ کشمیر میں لوگ خوشی سے گھروں سے باہر نکل آئے اور ’پاکستان زندہ باد‘ کے نعرے لگائے۔

ضلع بڈگام کے علاقے جیرنڈ کلاں میں بھارتی فوجی ہیلی کاپٹر گرنے کے مقام پر بھی سیکڑوں کشمیری جمع ہوئے اور قابض بھارتی فوجیوں کی موجودگی میں ’جیوے جیوے پاکستان‘ اور ’آزادی‘ کے نعرے لگائے۔ 

ہیلی کاپٹر گرنے کے مقام پر بھی سیکڑوں کشمیری جمع ہوئے اور قابض بھارتی فوجیوں کی موجودگی میں ’جیوے جیوے پاکستان‘ اور ’آزادی‘ کے نعرے لگائے— فوٹو: اے ایف پی

یاد رہے کہ  پاکستانی فضائیہ کے لڑاکا طیاروں نے بھارت کو بھرپور جواب دیتے ہوئے 2 طیارے مارے گرائے جب کہ ایک پائلٹ کو بھی گرفتار کرلیا ہے۔

مزید خبریں :