29 اپریل ، 2019
بھارت میں لوک سبھا انتخابات کے چوتھے مرحلے کیلئے پولنگ ہوئی جس میں 9 ریاستوں میں لوک سبھا کی 72 نشستوں کے لیے ووٹرز نے اپنا حق رائے دہی استعمال کیا۔
بھارت کی ریاست مہاراشٹرا، اتر پردیش، راجستھان، مغربی بنگال، مدھیہ پردیش، اڑیسہ، بہار، جھاڑ کھنڈ اور مقبوضہ کشمیر میں ووٹنگ ہوئی۔
بھارتی ریاست مہاراشٹرا کے شہر ممبئی میں بھی پولنگ ہوئی جہاں نا صرف بالی وڈ کے بڑے بڑے ناموں نے اپنا حق رائے دہی استعمال کیا بلکہ ساتھ ساتھ سوشل میڈیا کے ذریعے مداحوں کو بھی ووٹ دینے کی ترغیب دی۔
بالی وڈ اسٹار سلمان خان نے بھی صبح صبح اپنا ووٹ کاسٹ کیا۔
شاہ رخ خان، اہلیہ گوری خان اور بیٹے کے ہمراہ پولنگ اسٹیشن آئے اور اپنا ووٹ کاسٹ کیا۔
مسٹر پرفیکشنسٹ عامر خان اور ان کی اہلیہ کرن راؤ نے بھی اپنے حق رائے دہی کا استعمال کیا۔
بالی وڈ کے ’منا بھائی‘ سنجے دت نے بھی اہلیہ منایتا دت کے ساتھ ووٹ کاسٹ کیا۔
رنویر سنگھ نے بھی اپنا ووٹ ممبئی میں کاسٹ کیا لیکن ان کی اہلیہ دپیکا پڈوکون ان کے ساتھ ووٹ ڈالنے نہیں آئیں بلکہ ان کے بعد جاکر ووٹ کا استعمال کیا۔
بالی وڈ اداکار اجے دیوگن، سلمان خان کے بھائی سہیل خان و ارباز خان اور پریتی زنٹا نے بھی اپنا حق رائے دہی استعمال کیا۔
بھارتی فلم نگری کے مشہور رائٹر و شاعر سمپورن سنگھ کالرا عرف گلزار صاحب، اداکار پریم چوپڑا اور عمران ہاشمی نے بھی اپنا اپنا ووٹ کاسٹ کیا۔
بالی وڈ اداکارہ ارمیلا انتخابات میں کانگریس کی امیدوار بھی ہیں، انہوں نے بھی ممبئی میں ووٹ کاسٹ کیا جب کہ ودیا بالن نے بھی حق رائے دہی کا استعمال کیا۔
پروڈیوسر و ہدایتکار راکیش روشن نے بھی بیٹے ہریتھک روشن اور خاندان کے دیگر افراد کے ہمراہ قریبی پولنگ اسٹیشن میں ووٹ کاسٹ کیا۔
امریکا میں شادی کرنے والی پریانکا چوپڑا ان دنوں ممبئی میں موجود ہیں تو انہوں نے بھی اپنا حق رائے دہی استعمال کیا اور سوشل میڈیا پر مداحوں کو بھی اس کی ترغیب دی۔
بھارتیہ جنتا پارٹی کی امیدوار و ماضی کی ڈریم گرل ہیما مالنی اور ان کی صاحبزادیوں نے بھی اپنا ووٹ ممبئی میں کاسٹ کیا۔
بالی وڈ کے میگا اسٹار امیتابھ بچن اپنی اہلیہ جیا بچن اور بہو ایشوریا رائے کے ہمراہ ووٹ کاسٹ کرنے کے بعد انگلی پر سیاہی کا نشان دکھا رہے ہیں۔