30 اپریل ، 2019
گیم آف تھرونز کی تخیلاتی دنیا کے مشرق کے لوگوں نے ونٹرفیل کے معرکے میں اگرچہ کامیابی حاصل کر لی ہے لیکن اس شہرہ آفاق ڈرامے کا معروف کردار "ٹیرئین لینسٹر" پاکستان کے مشرقی شہر راولپنڈی کے ایک چھوٹے سے ہوٹل میں موجود ہے۔
روزی خان سوشل میڈیا پر ایک سلیبرٹی کی حیثیت اختیار کر گئے ہیں اور اس کی وجہ ان کی معروف انگریزی سیریز گیم آف تھرونز" کے کردار "ٹیرئین لینسٹر" (پیٹر ڈنکلیج) سے مشابہت ہے۔
کچھ ماہ قبل تک 26 سالہ روزی خان بالکل بھی نہیں جانتے تھے کہ پیٹر ڈنکلیج کون ہیں لیکن ان کی زندگی اس وقت یکسر تبدیل ہوگئی جب ان کے ہوٹل کے مالک کے بیٹے نے ان کی تصاویر سوشل میڈیا پر پوسٹ کر دیں۔
روزی خان کہتے ہیں کہ انہیں ابتدا میں لوگوں نے پیٹر ڈنکلیج کہنا شروع کر دیا لیکن جب انہوں نے گیم آف تھرونز دیکھا تو انہیں معلوم ہوا کہ لوگ انہیں ایسا کیوں کہہ رہے ہیں۔
دونوں کی نہ صرف شکل ایک جیسی ہے بلکہ ان کا قد بھی 135 سینٹی میٹر لمبا اور بالوں کا اسٹائل بھی ملتا جلتا ہے۔
اب روزی خان کو ایک کھانے کی کمپنی کی جانب سے اشتہار میں بھی کام کرنے کا موقع مل گیا ہے۔
لیکن روزی خان کا کہنا ہے کہ ان کی خواہش ہے کہ وہ فلموں میں کام کریں جب کہ ان کی والدہ کی خواہش ہے کہ انہیں پیٹر ڈنکلیج سے بھی ملاقات کرنی چاہیے۔
یاد رہے کہ تقریباً ایک دہائی تک لوگوں کو اپنے سحر میں جکڑ کر رکھنے والے گیم آف تھرونز کا آٹھواں اور آخری سیزن 19 مئی کو ختم ہو گا۔