کھیل
Time 23 جون ، 2019

ورلڈکپ 2019: کیچز ڈراپ کرنے کا منفی ریکارڈ پاکستان ٹیم کے نام

فاسٹ بولر محمد عامر نے میچ میں چار کیچز چھوڑے— فوٹو: دی گارجین

لارڈز:انگلینڈ میں جاری کرکٹ ورلڈکپ میں پاکستان ٹیم جنوبی افریقا کے خلاف میچ تو جیت گئی لیکن روایتی فیلڈنگ کا مظاہرہ کرنے سے باز نہ آئی، قومی ٹیم نے میچ میں 7 کیچز ڈراپ کئے۔

اس میچ میں فاسٹ بولر محمد عامر کے ہاتھ 4 کیچز نہ آئے، وکٹ کیپر سرفراز احمد ، وہاب ریاض اور شاداب خان بھی کیچز نہ تھام سکے۔

جنوبی افریقی اننگز کے پہلے اوور میں ہی حفیظ کی گیند پر ڈی کاک کا کیچ وہاب ریاض نے چھوڑ دیا۔

اس کے بعد شاہین شاہ کی گیند پر کپتان فاف ڈوپلیسی کا کیچ شاداب خان پوائنٹ پر تھام نہ سکے۔

فوٹو: آئی سی سی

تیسرا کیچ محمد عامر نے مڈ اون پر وین ڈیر ڈسن کا گرادیا، چوتھا کیچ محمد عامر نے اپنی ہی گیند پر ڈیوڈ ملر کا چھوڑا۔

پانچواں کیچ سرفراز احمد نے وہاب کی گیند پر وین ڈیر ڈسن کا گرایا۔ چھٹا کیچ محمد عامر نے تھرڈ مین پر وہاب کی گیند پر پر ڈیوڈ ملر کا ڈراپ کیا جبکہ ساتواں کیچ بھی محمد عامر نے ڈیوڈ ملر کا چھوڑا۔

فوٹو: آئی سی سی

اعداد وشمار کے مطابق پاکستانی فیلڈرز کی جانب سے  رواں ورلڈکپ میں 14 کیچز ڈراپ ہوئے ہیں، صرف جنوبی افریقا کے خلاف میچ میں ہی سات کیچز اُن کے ہاتھوں میں نہ آسکے۔

اعداد وشمار کے مطابق پاکستانی فیلڈرز کی جانب سے رواں ورلڈکپ میں 14 کیچز ڈراپ ہوئے ہیں 

 اس فہرست میں دوسرا نمبر میزبان اور ایونٹ کی فیورٹ ٹیم انگلینڈ کا ہے جس کے کھلاڑی درجن بھر کیچ گرا چکے ہیں۔

نیوزی لینڈ کی ٹیم نے 9، جنوبی افریقا نے 8، ویسٹ انڈیز کی ٹیم نے 6، آسٹریلیا اور بنگلادیش نے چار، چار، سری لنکا نے تین اور افغانستان کے فیلڈرز دو کیچ تھامنے میں ناکام رہے ہیں۔

میگا ایونٹ میں بھارتی فیلڈرز کی کارکردگی سب سے اچھی ہے جنہوں نے صرف ایک ہی کیچ گرایا ہے ۔

مزید خبریں :